जोर बिजो प्रणलीबाट निजी सवारी साधन चल्न पाउने
भैरहवा, ७ असार । रूपन्देहीमा गएको बैशाख १६ गते देखि जारी गरिएको निषेधाज्ञा मंगलबार देखि थप खुकुलो बनाइने भएको छ । जिल्ला स्तरिय कोरोना संकट व्यवस्थापन समिति डीसीसीएमसीको सोमबार बसेको बैठकले भोली (मंगलबार) देखि सबै सरकारी कार्यालय खोल्ने र नीजि सवारी साधन चल्न पाउने निर्णय गरेको छ ।
बैठकले निजी सवारी साधन संचालनमा जोर बिजोर प्रणाली लागु गर्ने निर्णय गरेको छ । जिल्ला प्रशासन कार्यालय रुपन्देहीका प्रशासकिय अधिकृत जनक थापाका अनुसार निजी सवारी साधन चल्दा जोर–विजोर प्रणाली अनुसार चल्नु पर्ने छ । नीजि सवारी साधनको हकमा जोर गते जोर नम्बरका सवारी साधन र विजोर गते विजोर नम्बरका सवारी साधन मात्र चलाउन पर्ने प्रशासकीय अधिकृत थापाले बताउनु भयो । जिल्लामा सार्वजनिक सवारी साधन भने अझै खुला गरिएको छैन । यस्तै डीसीसीएमसीको बैठकले भोलीदेखि सबै सरकारी कार्यालय खोल्ने निर्णय पनि गरेको छ । यस अघि अत्यावश्यक कार्यालयहरु मात्र खुलेका थिए । यस्तै असार १ गतेबाट निश्चित समय पसल र व्यवसाय सञ्चालन गर्न पाउने गरि निषेधाज्ञा केही खुकुलो गरिएको थियो ।
जिल्लामा कोरोना संक्रमण तिब्र रुपमा फैलिदै गएपछि जिल्ला प्रशासन कार्यालय रुपन्देहीले बैशाख १६ गतेबाट निषेधाज्ञा जारि गरेको थियो ।
