भैरहवा, ३० जेठ । रुपन्देहीको रोहिणी गाउँपालिका र देवदह नगरपालिकाका बैदेशिक रोजगारीको लागि दक्षिण कोरियामा रहेका युवाहरुले रोहिणी गाउँपालिकालाई नगद सहयोग गरेका छन् ।
दक्षिण कोरियामा बिभिन्न काममा रहेका ९ जना युवाहरुले रोहिणी गाउँपालिका अध्यक्ष सनोज कुमार यादवको नाममा निवेदन लेखेरै सहयोग गरेका हुन । सहयोग गर्नेमा रोहिणी गाउँपालिका वडा नम्बर ३ घर भएका ताणकेश्वर मल्लाह, रमेश मल्लाह, असफाक खाँन, धरमेन्द्र मल्लाह, वडा नम्बर २ का सन्तोष यादव, सुखराम खरविन्द, दिलिप प्रजापति, वडा नम्बर ५ का सुभान अन्सारी र देवदह नगरपालिकाका बिरु मल्लाह रहेको रोहिणी गाउँपालिकाका अध्यक्ष सनोज कुमार यादवले जानकारी दिनुभयो । उनीहरु सबैजना मिलेर गाउँपालिकालाई १ लाख ४३ हजार २ सय ५४ रुपैयाँ गाउँपालिकाको खातामा पठाई दिएका छन् ।
‘विपदको बेला रोहिणी गाउँपालिकालाई अन्य संघ संस्था एवम सामाजिक ब्यक्तित्वहरुले पनि सहयोग गरेका छन् । तर बिदेश बस्ने यी युवाहरुकोे सहयोग अत्यन्तै सराहनिय छ ।’ अध्यक्ष यादवले भन्नुभयो । बिदेशमा आफ्ना पसिना बगाएका युवाहरुले आफ्नो पसिनाको कमाइबाट मातृभूमिलाई सम्झिनु नै ठूलो कुरा भएको भन्दै अध्यक्ष यादवले कोरोना महामारीको समयमा बिदेशिएका युवाहरुको सहयोगी मनलाई रोहिणी गाउँपालिकाको सदैव सम्मान गर्ने बताउनु भयो ।
बिभिन्न सञ्चार माध्यमहरुबाट रोहिणी गाउँपालिकामा पनि कोभिडको प्रभाव उच्च रहेको र अक्सिजन लगायत सामाग्रीको अभाव रहेको कुरा थाहा पाएर थोरै भए पनि सहयोग गरेको युवा ताणकेश्वर मल्लाहको भनाइ छ । ‘बिदेशमा रहे पनि आफ्नो जन्मभूमिमा अप्ठ्यारो पर्दा केही गर्नुपर्छ भन्ने लागेर हामी ९ जनाले रकम जम्मा गरेर पठाएका हौ ।’ मल्लाहले भन्नुभयो । गाउँपालिकामा केही विपद वा समस्या परे यो रकम परिचालन होस भन्ने उनिहरुको अपेक्षा छ । भविष्यमा यस्ता सहयोग गरिरहने समेत उनीहरुले प्रतिवद्धता जनाएका छन् ।
