रेडक्रस रुपन्देहीद्वारा तीन स्थानीय तहका आइसोलेशन सेन्टरलाई स्वास्थ्य सामाग्री सहयोग

बुटवल, २९ जेठ । नेपाल रेडक्रस सोसाइटी रुपन्देहीले रुपन्देहीका तीन स्थानीय तहले संचालन गरेका आइसोलेशन सेन्टरलाई स्वास्थ्य सामाग्री सहयोग गरेको छ ।
रेडक्रसले युनिसेफ नेपालको साझेदारीमा सञ्चालित कोभिड–१९ पूर्व तयारी तथा प्रतिकार्य कार्यक्रम अन्तर्गत लुम्बिनी सांस्कृतिक र सिद्धार्थनगर नगरपालिका तथा सम्मरीमाई गाउँपालिकामा रहेका आइसोलेशन सेन्टरलाई आवश्यक स्वास्थ्य सामग्री सहयोग गरेको हो ।
सिद्धार्थनगर नगरपालिका प्रमुख हरिप्रसाद अधिकारी, लुम्बिनी सांस्कृतिक नगरपालिका प्रमुख मनमोहन चौधरी र सम्मरीमाई गाउँपालिका अध्यक्ष जितेन्द्रनाथ शुक्ला (बब्बु) लाई स्वास्थ्य सामाग्री हस्तान्तरण गरेको रेडक्रस रुपन्देहीका अध्यक्ष प्रेमलाल उदासले जानकारी गराउनु भयो ।
रेडक्रसले यी पालिकालाई खानेपानी ट्यांकी, ह्याण्ड वासिङ स्टेशन, माक्स, सेनिटाइजर, हर्पिक, फिनेल, साबुन, युरिगार्ड, पानी फिल्टर जग, सेनिटाइजर इन्सुरेन्सी लगायत स्वास्थ्य सामग्री हस्तान्तरण गरेको हो । प्रत्येक स्थानीय तहलाई १ लाख ८० हजारदेखि २ लाख रुपैयाँसम्मको स्वास्थ्य सामाग्री प्रदान गरिएको नेपाल रेडक्रस सोसाइटी रुपन्देही जिल्ला शाखाले जनाएको छ ।
रेडक्रसले जेठ १ गतेदेखि स्वयंसेवक परिचालन गरी बेलहिया नाकामा आवतजावत गर्ने यात्रुलाई समेत निःशुल्क खानेपानी वितरण गर्दै आइरहेको रेडक्रस, रुपन्देही जिल्ला शाखाका उपसभापति दीपक क्षेत्री न्यौपानेले बताउनु भयो । त्यस्तै रेडक्रसले भारतबाट घर फर्किने नेपालीहरु संक्रमित भएको खण्डमा उनीहरुलाई निःशुल्क रुपमा घरसम्म पुर्याउँदै समेत आएको छ ।
सम्मरीमाई गाउँपालिकाका अध्यक्ष शुक्लले ढिलै भए पनि स्वास्थ्य सामाग्री सहयोग प्राप्त भएको भन्दै यसले गाउँपालिकामा कोरोना महामारी नियन्त्रण तथा रोकथाम गर्न सहयोग पुग्ने विश्वास ब्यक्त गर्नुभयो ।