बुटवल, १८ जेठ । जनता समाजवादी पार्टी (जसपा) को उपेन्द्र यादव पक्षले अर्का अध्यक्ष महन्थ ठाकुरसहित चार नेतालाई पार्टीबाट निष्कासन गरेको छ ।
बहुमत कार्यकारिणी सदस्यहरुको सोमबार बसेको बैठकले अध्यक्ष ठाकुर, वरिष्ठ नेता राजेन्द्र महतो, नेताद्वय लक्ष्मण लाल कर्ण र सर्वेन्द्रनाथ शुक्ललाई पार्टीबाट निष्कासन गरेको हो ।
पार्टीका प्रचार विभाग प्रमुख डम्बर खतिवडाले विज्ञप्ति जारी गरी चार नेतालाई पार्टीबाट निष्काशन गरेको जानकारी दिनुभयो । ७ जेठमा नेकपा एमालेका अध्यक्ष केपी शर्मा ओलीलाई धारा ७६(५) अनुसार प्रधानमन्त्री नियुक्तिका लागि हस्ताक्षर गरेपछि जनता समाजवादी पार्टीका केन्द्रीय परिषद अध्यक्ष उपेन्द्र यादवले अर्का अध्यक्ष महन्त ठाकुर सहित चार नेतालाइ स्पष्टिकरण सोध्नुभएको थियो ।
यादव पक्षले जेठ ११ गते तीन दिनको समय दिएर स्पष्टिकरण सोधेकोमा ठाकुर पक्षले पनि यादवलाई स्पष्टिकरण सोधेको थियो । पुन जेठ १५ गते २४ घण्टे स्पष्टिकरण पत्र पठाएको याद पक्षले मंगलबार बैठक राखेर ठाकुर सहित चार नेतालाई निष्कासनको निर्णय गरेको हो ।
यस्तै ठाकुर पक्षले पनि यसको जवाफमा यादवलाई निष्कासनकै निर्णय गर्ने तयारी गरेको छ । जेठ १५ गते ठाकुरले अर्का अध्यक्ष यादवलई २४ घण्टे स्पष्टिकरण पत्र पठाउनु भएको थियो ।
पार्टीका नेता मोहम्मद इस्तियाक राईले ठाकुर सहित चार नेतालाई पार्टी सदस्यबाट निष्कासन गरिएको जानकारी निर्वाचन आयोगमा दिएको जानकारी दिनुभयो ।
