बुटवल, ९ चैत । सुन्दा अचम्म लागे पनि घटना यर्थाथ भएपछि विश्वास गर्नै पर्ने घटना रुपनदेहीमा घटेको छ ।
रुपन्देहीमा एक युवतीलाई बलत्कारपछि हत्या प्रयास गरेको अभियोगमा एक प्रहरी जवान पक्राउ परेका छन् । पीडित युवतीको अभिभावकको किटानी जाहेरीका आधारमा नवलपरासी जर्घा स्थित जनपथ प्रहरीका प्रहरी जवान सुरेश कठरिया (थारु) लाई पक्राउ गरिएको प्रहरीले जनाएको छ ।
जँगलमा बेहोस अवस्थामा फेला परेकी युवतीलाई स्थानीयले उद्धार गरेका थिए । स्थानीयले उद्धार गरि लुम्बिनी प्रादेशिक अस्पताल बुटवलमा उपचारार्थ भर्ना गरेका र उपचारपछि होसमा आएकी १९ बर्षिय युवतीले आफूलाई कठरियाले जबरजस्ती करणी गरी घाँटी थिचेर हत्याको प्रयास गरेको बताएकी थिईन । युवतीको बयानका आधारमा आरोपित प्रहरी जवानलाई प्रहरीले पक्राउ गरेको हो ।
कानुनको रक्षक प्रहरी जवानकै संलग्नतामा घटना भएकाले यो घटना लुक्न सक्ने आशंका गरिएको थियो । तर, स्थानीयले निलडाम सहित बेहोस अवस्थामा फेला परेकी युवतीको उद्धार गरेपछि पीडित युवती बाट घटना सार्वजनिक भएसंगै प्रहरीले आरोपितलाई पक्राउ गरेको हो । इलाका प्रहरी कार्यालय बुटवलका प्रहरी नायव उपरीक्षक प्रतित सिंह राठौरले घटनाका बारेमा अनुसन्धान भइरहेको जानकारी दिनुभयो । उहांका अनुसार पक्राउ परेका प्रहरी जवानलाई नियन्त्रणमा लिइसकेको र अन्य व्यक्तिहरुको संलग्नताको खोजी भइरहेको छ ।
सामाजिक सन्जाल मार्फत चिनजान भएकी युवतीलाई प्रहरी कर्मचारीले पटक–पटक भेट्न दबाब दिने गरेको पीडित युवतीकी दिदिले बताएकी छिन् । घाईते युवतीकी दिदीले आर्थिक सहयोग गर्ने आश्वासन दिदै ललाई फकाइ गरि प्रहरी जवान कठरियाले बहिनीलाई बलात्कार गरेको हुनसक्ने बताईन् ।
प्रहरी जवान कठरियाले जबर्जस्ती बलात्कार गरेपछि ब्यागको रसीले घाँटीमा बेरेर हत्या प्रयास गरेको पीडित युवतीको भनाई छ । ज्याला मजदुरी गरेर परिवार पालेका युवतीकी आमाले छोरीको लुम्बिनी प्रादेशिक अस्पतालमा उपचार गराईरहेकी छिन् ।
