आम जनताको भावना बुझेर फैसला गर्न सर्वोच्चलाई गगनको सुझाव

कावासोती, ९ फागुन । नेपाली काँग्रेसका युवा नेता गगन थापाले संसद विघटनको मुद्दामा सर्वोच्चले आमजनताको भावना बुझेर फैसला गर्नुपर्नेमा जोड दिनुभएको छ ।
आइतबार पूर्वी नवलपरासीको हुप्सेकोटमा नेपाली काँग्रेसको आमसभालाई सम्बोधन गर्दै नेता थापाले प्रधानमन्त्री र उहांका केही सीमित पक्षधर बाहेक सबैले संविधान विघटनलाई असंवैधानिक र अलोकतान्त्रिक भनिरहेको बताउँदै सर्वोच्चलाई आमजनताको भावना बुझेर फैसला गर्न सुझाव दिनुभयो ।
नेपाली जनताले यति बेला सर्वोच्चका न्यायाधीशहरुको विवेकको परीक्षण गरिरहेको बताउँदै नेता थापाले न्यायाधीशहरुले विवेक र साहस देखाउने बेला भएको बताउनुभयो । नेता थापाले प्रधानमन्त्री केपी शर्मा ओलीले पदको दुरुपयोग गरेर संसद पुनस्थापना नगर्नका लागि सर्वोच्चलाई धम्काएको आरोप समेत लगाउनुभयो ।
आमसभामा नेपाल तरुण दलका कोषाध्यक्ष विद्वान गुरुङ, नेविसंघ महामन्त्री युवराज पाण्डे, पूर्व सांसद महेन्द्र ध्वज जि सी, प्रदेश सभा सदस्य कृष्णचन्द्र नेपाली, विष्णु लामिछाने, ओमकला गौतम, काँग्रेस नवलपुरका जिल्ला नेताहरु चन्द्रबहादुर राना, विष्णुकुमार कार्की लगायतले केपी ओलीले संसद विघटन गरेर संविधानको कु गरेको आरोप लगाउनु भयो ।