बुटवल, ९ फागुन । बुटवल उद्योग बाणिज्य संघ रुपन्देहीले संघ स्थापना दिवसको अवसरमा रक्तदान गरेको छ । संघको ६८ औं स्थापना दिवसको अवसरमा आईतबार संघको सचिवालय परिसर बालमन्दिरमा रक्तदान गरिएको हो । बुटवल उद्योग बाणिज्य संघ रुपन्देहीको २०१० साल फागुन १० स्थापना भएको थियो । रक्त सञ्चार सेवा केन्द्र बुटवलको प्राबिधिक सहयोगमा भएको रक्तदान कार्यक्रममा ५० जनाले रक्तदान गरेको संघले जनाएको छ ।
रक्तदान कार्यक्रमको सुभारम्भ गर्दै संघका अध्यक्ष खिमबहादुर हमालले संघले स्थापना दिवसमा रक्तदान कार्यक्रम गर्दै आएको र आगामी दिनमा पनि निरन्तरता दिने बताउनु भयो । कार्यसमिति सदस्य भेषराज गैरेको संयोजकत्वमा भएको रक्तदान कार्यक्रममा संघका पूर्व अध्यक्ष, पदाधिकारी, कार्यसमिति सदस्य, साधारण सदस्य र उद्योगी व्यबसायीहरुको सहभागिता रहेको थियो ।
रक्तदान गर्ने रक्तदाताहरुलाई त्यसै अवसरमा प्रमाणपत्र समेत प्रदान गरिएको थियो । संघले स्थापना दिवसको अवसरमा साँझ सचिवालयमा दीपावली कार्यक्रम समेत गरेको छ । स्थापना दिवसकै अवसरमा पूर्वअध्यक्षहरुलाई सम्मान र बुटवल माध्यमिक बिद्यालयलाई डेस्क बेन्च प्रदान गरिएको थियो ।
