बुटवल, ९ फागुन । केपीओली सरकारले घोषणा गरेको निर्वाचनको मिति नजिकिएसँगै नेकपा ओली पक्षका महासचिव तथा अर्थमन्त्री विष्णु पौडेलले आफ्नो निर्वाचन क्षेत्र केन्द्रित उद्घाटन र शिलान्यास काकार्यक्रमलाई तिब्रता दिनुभएको छ् ।
२ महिना अघि एउटै परियोजना अन्तर्गत तेस्रो पटक झुम्सा बुटवल खानेपानीको शिलान्यास गर्नुभएका कामचलाउ सरकारका मन्त्री पौडेलले अघिल्लो महिना कार्य सम्पन्न भएको झण्डै डेढ वर्ष पुगेको तिनाउ नदीको पुल उद्घाटन गर्नुभयो ।
मन्त्री पौडेलले अघिल्लो महिनामा नै २०७२ सालमा थालिएको बुटवल बेलहिया सडक खण्डको अन्तिम खण्ड राजमार्ग चौराहा देखि चिडियाखोला खण्डको पनि शिलान्याश गर्नुभएको हो । उहाँले केही महिना पहिले तिनाउ दानव नदी करिडोरको पनि शिलान्याश गर्नुभएको थियो ।
आईतवार मात्र मन्त्री पौडेलले बुटवलदेखि नुवाकोट गढी पुग्ने करिब २ किलोमिटर दुरीको केवुलकार निर्माणको शिलान्यास गर्नु भएको छ । मन्त्री पौडेलले गरेको शिलान्याशले सार्थकरुप ग्रहण गरे अवको डेढवर्षमा ऐतिहासिक, धार्मिक, साँस्कृतिक तथा प्राकृतिक हिसाबले पर्यटकीय गन्तव्यका रुपमा विकास भइरहेको पाल्पाको तिनाउ–२ मा अवस्थित नुवाकोट गढीसम्म केवुलकारमा बसेर पुग्न सकिने छ ।
नुवाकोटमा केबलकार सञ्चालनको लागि सिद्धार्थ केबलकार प्रालिले यस अघि नै सरकारबाट वन क्षेत्र उपयोग गर्ने स्वीकृती लिएर केहीकाम अगाडी बढाइसकेको छ । केबलकारको आवश्यक पूर्वाधाार निर्माणको काम सुरु भईसकेको प्रालिका अध्यक्ष राजेन्द्रसिंह गुरुङले जानकारी दिनुभयो । १८ महिना भित्रै बुटवल–नुवाकोट केवुलकार सञ्चालनका लागि करिब ७५ करोडको ठेक्का लागतमा सम्झौता भएको छ । ५० जना पर्यटन व्यवसायीहरु आवद्ध सिद्धार्थ केवलकार प्रा.लि ले केवलकारमा लगानी गरेका छन् ।
मनोरम हिमश्रींखलाका साथै तराईका फाँट र भैरहवासम्मका दृष्य देख्न सकिने नुवाकोट गढीसम्म पुग्नकालागि केवुलकार विस्तार हुने भएपछि पर्यटकलाई सहजहुने भएको छ ।
बाइसे चौविसे राज्यका बेला राजा मणिमुकुन्द सेनको गृष्मकालिन दरबार, तोपहान क्षेत्र, खरखजनाघर र रानीकुवा समेत रहेको नुवाकोट सम्मपुग्न केवलकार सञ्चालनसँगै यस क्षेत्रको पर्यटन विकासमा टेवापुग्ने पर्यटन व्यवसायी माधव नेपालले बताउनु भयो ।
