सूर्य चिन्ह प्रचण्डलाई दिने कि ओलीलाई दिने छिटो निर्णय गर्न आयोगलाई देउवाको आग्रह

भैरहवा, ३ फागुन । नेपाली काँग्रेसका सभापति शेरबहादुर देउवाले निर्वाचन आयोगले निर्वाचनको तयारी नगरेको भन्दै आयोगको आलोचना गर्नुभएको छ । प्रतिनिधिसभा विघटन भएको ६ महिनाभित्र निर्वाचन भइसक्नुपर्ने संवैधानिक ब्यवस्था रहेको भएपनि निर्वाचन आयोगले यसतर्फ मतलव नराखेको काँग्रेस सभापति देउवाको आरोप छ ।
निर्वाचन जतिवेला पनि हुन सक्ने भएकाले निर्वाचन आयोग सधै निर्वाचनको तयारीमा रहनुपर्छ भन्दै सभापति देउवाले अहिले सम्म कुनै तयारी नगरेकाले निर्वाचन आयोग माथि शँका उत्पन्न भएको बताउनु भयो ।
प्रतिनिधिसभा विघटनको विरोधमा रुपन्देहीको भैरहवामा नेपाली काँग्रेस रुपन्देहीले आयोजना गरेको बिरोध सभालाई सम्बोधन गर्दै पूर्व प्रधानमन्त्री समेत रहनुभएका सभापति देउवाले भन्नुभयो–‘ ‘ओलीले वैशाखसम्म चुनाव गराउँछु भनेको छ । तर निर्वाचन आयोगले अहिलेसम्म केहीभनेको छैन । यसैले निर्वाचन आयोगमाथि शंका उत्पन्न भएको छ ।’ सरकारले निर्वाचनको मिति घोषणा गरेको भएपनि निर्वाचन आयोगले अझैंसम्म निर्वाचनको कार्यतालिका सार्वजनिक नगरेको भन्दै आक्रोश ब्यक्त गर्नुभयो ।
सभापति देउवाले निर्वाचन आयोगले ६ महिनाभित्र चुनाव गराएरै छाड्छु भनेर जनतालाई भन्नुपर्ने बताउनु भयो ।
देउवाले अदालतले चुनावमा जानुपर्छ भन्यो भने तयार हुनुपर्ने बताउँदै अदालतलाई विश्वास गर्न आग्रह गर्नुभयो । प्रतिनिधिसभा विघटनको मुद्धा अदालतमा बिचाराधिन भएको अवस्थामा सडकबाट दबाव सिर्जना गर्नु गलत भएको र अदालतबाट हुने निर्णय आफुहरुलाई मान्य हुने देउवाले बताउनुभयो ।
नेकपाको बैधानिकताका विषयमा समेत अहिलेसम्म निर्णय नगरेको आयोगले कतै निर्वाचन गराउनै नचाहेको त होइन भन्ने देउवाको आशंका छ । सूर्य चुनाव चिन्ह एउटै रहेको भन्दै उहांले प्रचण्डलाई दिने कि ओलीलाई दिने छिटो निर्णय गर्न आयोगलाई आग्रह गर्नुभयो ।
कार्यक्रममा नेपाली कांग्रेसका केन्द्रीय सदस्य बालकृष्ण खाँण, विघटित प्रतिनिधिसभा सार्वजनिक लेखा समितिका सभापति भरत कुमार शाह, विघटित संसदका सदस्य प्रमोद यादव, प्रदेशसभा सदस्य रमा अर्याल, क्षेत्रिय सभापति मातृका यादव, सिद्धार्थनगर सभापति दिलिप धिताल, विद्यार्थी नेता मुक्तिराज पौडेल, पार्टीका जिल्ला उपसभापति सरिता चौधरी, सचिव रुामकृष्ण खाँण लगायतले बोल्नु भएको थियो । सभा सुरु हुनु अघि बुद्धचोकबाट सुरु भएको ¥याली नारायणस्थान, विद्रोहीचोक, मिलनचोक, गल्लामण्डी हुँदै रामजानकी हनुमान मन्दिरमा पुगेर सभामा परिणत भएको थियो ।