बुटवल, २९ माघ । नेपाली कांग्रेसले फागुन ३ गते रुपन्देहीको भैरहवामा बिरोधसभा गर्ने भएको छ । प्रधानमन्त्री केपी शर्मा ओलीको सिफारिसमा पुस ५ गते राष्ट्रपति विद्यादेवी भण्डारीले गरेको प्रतिनिधिसभा (संसद) विघटन विरुद्ध कांग्रेसले देशभर फरकफरक ढंगले विरोध प्रदर्शन गरिरहेको छ । प्रतिनिधिसभा विघटनलाई असंवैधानिक, अलोकतान्त्रिक र सर्वसत्तावाद उन्मुख कदम भन्दै आन्दोलित कांग्रेसको तेस्रो चरण आन्दोलन गरिरहेको छ । यता बुटवलमा नेपाली कांग्रेस बुटवल उपमहानगर समितिका सभापति खेलराज पाण्डेको अध्यक्षतामा बैठक बसी ३ गतेको कार्यक्रम भब्य बनाउने निर्णय गरेको छ । पार्टी सभापति अब्दुल रज्जाकको प्रमुख आतिथ्यतामा बसेको बैठकमा क्षेत्रिय सभापति हरि लम्साल, नगर सचिब ज्योती भण्डारी लगायतले बोल्नुभएको थियो ।
फागुन ३ गते भैरहवामा हुने बिरोधसभामा बुटवलबाट उल्लेख्य सहभागिता जनाउने निर्णय गरिएको सचिब भण्डारीले बताउनुभयो । सो कार्यक्रममा पार्टी सभापति शेरबहादुर देउवा तथा शिर्ष नेताहरुको सहभागिता रहनेछ । कांग्रेसले फागुन ३ गते देशभरका ७७ जिल्ला कार्यसमितिहरुकोे नेतृत्वमा एकैसाथ सशक्त प्रदर्शनको कार्यक्रम तय गरिसकेको छ । यसअघि कांग्रेसले पुस १३, पुस २५, माघ ३, माघ ८ र माघ १९ मा विभिन्न तहमा विरोध कार्यक्रम गरेको थियो ।
