बुटवल, २४ माघ । नेकपा प्रचण्ड–नेपाल समूहका नेता तथा पूर्वमन्त्री दलजित श्रीपालीले प्रधानमन्त्री ओली दलित तथा उत्पीडित जनताको विरुद्धमा रहेको आरोप लगाउनुभएको छ ।
दुई तिहाई नजिकको सरकारको नेतृत्व गरेको बेला उत्पीडित वर्ग र समुदायको अधिकार लेखिएको संविधान प्रधानमन्त्री ओलीले च्यातेको उहाँले टिप्पणि गर्नुभयो । प्रचण्ड–नेपाल समूहको नेपाल दलित मुक्ति संगठन रुपन्देहीको जिल्ला स्तरीय कार्यकर्ता भेलालाई सम्बोधन गर्दै नेता श्रीपालीले ओली नेतृत्वको सरकार र समूह दलित मुक्ति विरोधी भएको आरोप लगाउनु भयो ।
उहाँले परिवर्तनका पक्षधरहरु अहिले प्रतिगमनको पक्षमा लाग्दा वर्षौंदेखिको उत्पीडितहरुको मुद्धा ओझेलमा पर्ने बताउनु भयो । दलितको पृष्ठभूमिबाट गएका दलित नेताहरु प्रधानमन्त्रीको फोटोकपि मात्रै बनेको उहांको आरोप छ । ‘प्रतिगमनमा साथ दिनेहरु दास हुन्’ उहाँले भन्नु भयो । उहाँले प्रधानमन्त्री ओलीलाई कुख्यात तानासाहको संज्ञा दिदै पूर्वमन्त्री श्रीपालीले अब ओली अवशान नजिकै आइसकेको बताउनु भयो ।
दलित मुक्ति संगठनका सहइन्चार्ज समेत रहेका नेता श्रीपालीले दलित तथा उत्पीडित समुदाय सदैव प्रतिगमनका विरुद्धमा उत्रेको बताउनु भयो । उहाँले निरकुंश राणा शासनदेखि, पञ्चायत, बहुदल र गणतन्त्र प्राप्तिको यूगसम्म आइपुग्दा दलित समुदायले ठूलो योगदान गरेको बताउँदै अहिले फेरि संविधानबाट प्राप्त उपलब्धि गुम्ने खतरामा रहेको बताउनु भयो ।
कार्यक्रममा नेकपा प्रचण्ड–नेपाल समूहका नेता तथा दलित अधिकारकर्मी गणेश विश्वकर्माले केपी ओली नेतृत्वको सरकारले दलितका लागि संविधानले दिएको अधिकार समेत कटौती गरेर संसद विघटनपछि भूमि दिने नक्कली कुरा गरेको आरोप लगाउनु भयो । उहाँले संविधानको मौलिक हकमा दलितको अधिकार राखेर भूमिहिन दलितका लागि एक पटकका लागि जमिन दिने उल्लेख गरेपनि अहिले जागिर गरेको, भाडामा बसेको जस्ता प्रावधान राखेर बञ्चित गर्न खोजेको बताउनु भयो ।
संविधानसभा सदस्य तथा दलित अधिकारकर्मी विनोद पहाडीले प्रधानमन्त्री ओली उत्पीडित र दलित समुदायको विरुद्धमा सार्वजनिक अभिव्यक्ति दिने आरक्षण विरोधी पात्र भएको टिप्पणी गर्नु भयोे । कार्यक्रममा नेकपा प्रचण्ड–नेपाल रुपन्देहीका सचिव निर्मल जिसिले प्राप्त अधिकारमाथि धावा बोल्ने गरि संसद विघटन भएकाले यसले उत्पीडित दलित समुदायको अधिकारलाई कुण्ठित गर्न सक्ने बताउनु भयो । दलित आन्दोलनको गौरव र मुक्तिको ऐजेन्डा स्थापित गर्नका लागि पनि सच्चा कम्यूनिष्ट पार्टी चिन्नुपर्नेमा उहांले जोड दिनु भयो ।
