भैरहवा, १८ माघ । रुपन्देहीको भैरहवामा जारि तेस्रो खड्गप्रसाद गौचन मेमोरियल अण्डर–१६ राष्ट्रिय क्रिकेट प्रतियोगितामा आइतबार धनगढी क्रिकेट एकेडेमीले साई ग्लोबल एकेडेमीलाई ९२ रन र ओशिष क्रिकेट एकेडेमीले रुपन्देही ११ लाई ९ विकेटले पराजित गरेको छ ।
सिद्धार्थ रंगशालामा भएको पहिलो खेलमा टस हारेर ब्याटिङ गरेको धनगढीले निर्धारित २५ ओभरमा ६ विकेट गुमाई २२१ रन बनायो । उसका लागि कप्तान नरेन भट्टले ५० बल खेल्दै ९९ रन बनाए । उनी सतक बनाउन १ रनले चुके । यस्तै, सन्दिप विष्टले ४५ बलमा ५८ रन बनाए । बलिङमा साई ग्लोबलका ताहिर खान र सैजाद आलमले समान २÷२ विकेट लिए ।
जवाफमा साई ग्लोबल २३ ओभरमा अलआउट हुँदै १२९ रन मात्रै बनायो । उसका लागि आशिष रोकाले ४१ र सचिन अर्यालले १६ रन बनाए पनि अन्य ब्याट्सम्यानले दोहोरो अंक जोड्न सकेनन् । बलिङमा धनगढीका रजत राना ३ र भुपेश जोशीले समान ३÷३ विकेट लिए । खेलमा नरेश भट्ट म्यान अफ द म्याच भए ।
यस्तै, दोस्रो टस जितेर ब्याटिङ गरेको रुपन्देहीले सबै विकेट गुमाई ४६ रन मात्रै बनायो । उसका लागि समिर अली खानले ११ रन बनाए पनि अन्य ब्याट्सम्यान चल्न सकेनन् । बलिङमा ओशिषका सार्थक धितालले ४ तथा निश्चल श्रेष्ठले २ विकेट लिए । जवाफी ब्याटिङ गरेको ओशिषले ८.३ ओभरमा १ विकेट गुमाई ५० रन बनाउँदै लक्ष्य भेट्टायो । उसका लागि सम्राट भुसालले १९ रन बनाए । बलिङमा मनिष थापाले १ विकेट लिए ।
८ टिम सहभागी प्रतियोगितामा विजेता टिमले २० हजार रुपैयाँ र ट्रफी प्राप्त गर्नेछ । उपविजेताले १० हजार र ट्रफी प्राप्त गर्ने छ भने बेष्ट ब्याट्सम्यान, बलर, उत्कृष्ट खेलाडीलाई पनि पुरस्कृत गरिने छ । पूर्व राष्ट्रिय क्रिकेटर शक्तिप्रसाद गौचनको स्टार क्रिकेट एकेडेमी, पड्सरीको आयोजनामा प्रतियोगिता जारी छ । स्व.खड्गप्रसाद गौचन क्रिकेटर शक्तिका बुवा हुन् ।
