बुटवल, २३ पुस । बुटवलका समाजसेवी एबं धार्मिक अभियन्ता संघरत्न बज्राचार्यको निधन भएको छ । बज्राचार्यको ८६ वर्षको उमेरमा आफ्नै निवास रुपन्देहीको बुटवल उपमहानगरपालिका–३ पुल्चोकमा मंगलवार निधन भएको उहांका नाती विक्रम बज्राचार्यले जानकारी गराउनु भयो ।
१९९२ साल जेठ ७ गते जन्मिनुभएका बज्राचार्यले रुपन्देहीका विभिन्न सामाजिक संघसंस्था तथा धार्मिक संस्थाहरुमा महत्वपुर्ण योगदान पुर्याउनु भएको थियो । पद्मचैत्य विहार वुटवलको निर्माण कार्यदेखि ३२ वर्षसम्म विहारको अध्यक्ष भै नेतृत्वदायी भूमिका निर्वाह गर्नुभयो भने वुटवलकै परोपकार दान विभाग शाखाको प्रधान सेवकको रुपमा रहनुभएको थियो ।
विशेषगरी बुद्ध धर्मको प्रचार प्रसारमा महत्वपुर्ण योगदान पुर्याउनुभएका बज्राचार्यले नवलपरासीको दाउन्नेमा अवस्थित वुद्ध विहारको निर्माण गर्नुभएको हो । यस्तै उहांले बुटवलमा हैजाको प्रकोप फैलिएको समयमा युवाहरुलाई संगठित गर्दै हैजा नियन्त्रण गर्ने कार्यमा समेत महत्वपुर्ण योगदान पुर्याउनु भएको वुटवल नगरपालिकाका पूर्व उप प्रमुख विमाल बहादुर शाक्य स्मरण गर्नुहुन्छ ।
रुपन्देहीको सैनामैना नगरपालिका मुर्गियामा रहेको सोना ईटा उद्योगका संचालक समेत रहनुभएका बजाचार्यले २०५५ देखि ५७ सालसम्म लुम्विनी ईटा ब्यवसायी संघको अध्यक्षको जिम्मेवारी समेत सम्हाल्नु भएको थियो । उहांका चार भाई छोरा, २ छोरी र १२ जना नाति नातिना रहेका छन् ।
