लुम्बिनी प्रदेश उद्योग बाणिज्य संघको अध्यक्षमा रुपन्देहीका सुरेन्द्र र कृष्णको उम्मेदवारी

बुटवल, २० पुस । नेपाल उद्योग बाणिज्य महासंघ लुम्बिनी प्रदेशको २५ पुसमा हुने निर्वाचनका लागि अध्यक्ष पदमा रुपन्देहीको बुटवलका सुरेन्द्र प्रसाद श्रेष्ठ र भैरहवाका कृष्ण प्रसाद शर्माको उम्मेदवारी परेको छ ।
प्रदेश उद्योग बाणिज्य संघको नेतृत्वका लागि केही पदमा उम्मेदवारी परेपनि सर्व सम्मत गराउने प्रयास समेत भइरहेको संघका प्रदेश अध्यक्ष गुणनिधि तिवारीले जानकारी दिनुभयो । मंगलवारसम्म उम्मेदवारी फिर्ता लिने समय रहेकोले सर्वसम्मत गराउने प्रयास भईरहेको उहाँले बताउनु भयो ।
आफ्नो कार्यकालमा यस क्षेत्रमा उद्योगी ब्यवसायीको सहयोगवाट नै नेपाल उद्योग बाणिज्य महासघ लुम्बिनी प्रदेशले राम्रो काम गर्न सफल भएको उहाँको भनाई थियो ।
अध्यक्षका उम्मेदवार सुरेन्द्रप्रसाद श्रेष्ठले आफुलाई एक बर्ष अगाडिदेखिनै उद्योग बाणिज्य संघहरूले उम्मेदवार वनाउने घोषणा गरेकोले उम्मेदवारी दिएको वताउनु भयो । उहाँले लुम्बिनी प्रदेशका उद्योगी व्यवसायीको हितमा केन्द्रको निर्देशन अनुसार काम गर्ने वताउनु भयो ।
अध्यक्षका अर्का उम्मेदवार कृष्णप्रसाद शर्माले आफुले यस क्षेत्रका उद्योगी व्यवसायीको हितमा काम गर्ने प्रतिवद्धता जनाउनुभयो । नेपाल उद्योग बाणिज्य संघको निर्वाचनपछि मात्र शर्मालाई उम्मेदवार वनाईएको वताईएको छ । अध्यक्षमा सहमति हुन नसके दुईजनावीच प्रतिस्पर्धा हुनेछ । निर्वाचनको लागि जिल्ला नगरतर्फ ३० मत अर्थात ५० प्रतिशत र एशोसियट तर्फ १ सय १२ मत अर्थात ३० प्रतिशत गरि कुल १४२ मत रहेको छ ।
लुम्बिनी प्रदेशका १२ जिल्लाका ३६ उद्योग बाणिज्य संघ मध्ये ३० वटाले मतदान गर्ने छन् । यहाँ वस्तुगत तर्फभने मतदाता रहेका छैनन् । प्रदेश उपाध्यक्ष दुई पदका लागि दुईजना गोपाल भट्टराई र अमित गोयन्काको मात्र उम्मेदवारी परेकोले दुवैजना निर्विरोध हुनुभएको छ ।
कोषाध्यक्षमा एक पदका लागि दुईजनाको उम्मेदवारी परेको छ भने जिल्ला नगर सदस्यमा ५ पदका लागि ६ जनाको उम्मेदवारी परेको छ ।