बुटवल, १२ पुस । वाग्लुङ जिल्लाको धनमुढा चौर समाज बुटवल रुपन्देहीको आयोजनामा प्रथम राष्ट्रिय बी लेभलको खुल्ला ब्याडमिण्टन प्रतियोगिताको उपाधी पुर्वी नवलपरासीको नवलपुरका कृष्णप्रसाद सापकोटा र महेन्द्र कार्कीको टिमले जितेको छ ।
विजेता भएसंगै टिमले ५५ हजार ५५५ रुपैयाँ नगद, प्रमाणपत्र र शिल्ड प्राप्त गरेका छन् । उनीहरु रुपन्देहीको बुटवल ब्याडमिण्टन क्लवका लालमणि पन्थी र नारायण तिवारीलाई सोझो सेटमा हराउदै विजेता बनेका हुन् । उपविजेता रुपन्देहीको टिमले ३३ हजार ३३३ नगद, प्रमाणपत्र र शिल्ड प्राप्त गरेका छन् । प्रतियोगितामा मणिग्रामका पदम थापा र थमन राना तथा बुटवल तामनगर ब्याडमिण्टन क्लवका रेशम थापा र मनसुुन थापाको टिमले तृतिय स्थान हासिल गरेको छ । उनीहरुले ११ हजार १११ रुपैयां नगद, प्रमाणपत्र र शिल्ड प्राप्त गरेका छन ।
प्रतियोगितामा उत्कृष्ट खेलाडी अपिन श्रीपाली र अनुशासित खेलाडीमा वालधर गोदार चयन भै पुरस्कार प्राप्त गरेको प्रमुख एम्पाएर अर्जुन कार्कीले जानकारी गराउनु भयो । प्रतियोगितामा विजेता तथा उपविजेता टिमलाई लुम्बिनी प्रदेश प्रहरी तालिम केन्द्रका समादेशक प्रहरी वरिष्ठ उपरिक्षक रामदत्त जोशी र दंगा प्रहरी नियन्त्रण गणका प्रमुख प्रहरी उपरिक्षक विकास खनालले पुरस्कार तथा शिल्ड प्रदान गर्नुभएको थियो ।
प्रतियोगितामा ७६ टिमको सहभागिता रहेको प्रतियोगिता आयोजक संस्थाका सल्लाहकार पदम केसीले बताउनु भयो । बुटवल ११ ओलीपथमा रहेको कबर्डहलमा संचालित प्रतियोगिताको अध्यक्षता समाजका अध्यक्ष देव थापाले गर्नु भएको थियो ।
