मध्यावधि चुनाव नेपाली जनताको हित विपरित : तिलोत्तमा नगरपालिका

तिलोत्तमा, ९ पुष । प्रधानमन्त्री केपी शर्मा ओलीले संविधानको मर्म र जनभावना विपरीत सार्वभौंम प्रतिनिधिसभा विघटन गरेकोमा तिलोत्तमा नगरपालिकाले गम्भीर ध्यानाकर्षण भएको जनाएको छ ।
नगरपालिकाका प्रमुख बासुदेव घिमिरेले विज्ञप्ति जारी गरी प्रतिनिधिसभा विघटन गर्ने प्रधानमन्त्रीको कदमले संविधान र लोकतन्त्रलाई गम्भीर आघात पुर्याएको उल्लेख गर्नुभएको छ ।
संसद विघटनले देशमा राजनीतिक अस्थिरताको पुनरावृत्ति गरेको अनुभूति भैरहेको र यसले आम जनतामा निराशा छाएको विज्ञप्तिमा उल्लेख गरिएको छ । मध्यावधि चुनावका लागि खर्च हुने अर्बौं रकम स्वास्थ्य, भौतिक तथा सामाजिक विकास निर्माणका कार्यमा लगाउन उपयुक्त हुने भन्दै विकास बजेट कटौती गरेर गरिने मध्यावधि चुनाव नेपाली जनताको हित विपरित भएको टिप्पणी गरिएको छ । नगर प्रमुख घिमिरेले स्थायित्व, समृद्धि, विकास र सुशासनको लागि विघटित प्रतिनिधिसभा पुनःस्थापनाको माग गर्नु भएको छ ।