बुटवल,३० मंसिर
लुम्बिनी प्रदेश सभा सार्वजनिक लेखा समितिले शुक्रबार सम्म बेरुजु फछ्र्योट सम्बन्धमा भएको प्रगति बिबरण लिखित रुपमा उपलब्ध गराउन मन्त्रालयहरुलाई निर्देशन दिएको छ ।
प्रदेश मन्त्रालयका सचिवहरु समेतको उपस्थितिमा मंगलबार बसेको बैठकमा समितिले उक्त निर्देशन दिएको हो ।
महालेखा परीक्षकको कार्यालयले औल्याएको बेरुजु सम्बन्धमा छलफल गर्न मंगलबार बोलाइएको मन्त्रालयका सचिब सहितको बैठकमा सचिबहरुले बेरुजु फछ्र्योट सम्बन्धी मौखिक रुपमा मात्रै बिबरण प्रस्तुत गरेपछि शुक्रबारसम्ममा बेरुजु फछ्र्योट सम्बन्धी प्रगति बिबरण लिखित रुपमै उपलब्ध गराउन समितिले सचिबहरुलाई निर्देशन दिएको हो ।
समितिका सभापति डिल्लीबहादुर चौधरीले महालेखा परीक्षकको कार्यालयले औल्याएको प्रदेश मन्त्रालय र मातहतका कार्यालयहरुको बेरुजु फछ्र्योटको अवस्था र आगामि दिनमा बेरुजु नहुने गरी काम गर्ने बिषयमा मन्त्रालयको योजना बारे छलफल गर्न सचिबहरुलाई समितिमा बोलाइएको जानकारी दिनु भयो ।
बैठकमा मन्त्रालयका सचिबहरुले बेरुजु फछ्र्योटको बिबरण मौखिक रुपमा पेश गरेकोले आगामि शुक्रबारसम्ममा समितिलाई लिखित रुपमै बिबरण उपलब्ध गराउन मन्त्रालयका सचिबहरुलाई निर्देशन दिएको सभापति चौधरीले बताउनु भयो ।
मन्त्रालयले बेरुजु फछ्र्योटको बिबरण उपलब्ध गराएपछि आगामि सोमबार र मंगलबार पुन बैठक बसेर थप निर्देशन दिने पनि उहाले बताउनु भयो ।
प्रदेश सरकार नयाँ संरचना भएकोले बेरुजु नहुनेगरी काम गर्नुपर्ने भन्दै बैठकमा समितिका सदस्यहरुले संघीय सरकार अन्तरगतका मन्त्रालयहरुमा बिगत लामो समयदेखि बेरुजु रहे पनि प्रदेशले बेरुजु नरहनेगरी काम गर्नुपर्नेमा जोड दिनु भएको थियो ।
संघीयता बिरोधीहरुले प्रदेशलाई अनावस्यक र बोझको रुपमा चित्रित गर्ने प्रयास गरेकाले पनि प्रदेशले बेरुजु नरहनेगरी काम गर्नैपर्ने चुनौती खडा भएको उहाँहरुको भनाई थियो ।
समितिका सभापति चौधरीको सभापतित्वमा सम्पन्न बैठकमा समितिका सदस्य कूल प्रसाद पोखरेल,पावती पुन,वसीउद्दीन खाँ,गीता थपा,बिष्णु पन्थी,युवराज खनालले मन्त्रालयहरुद्धारा सञ्चालित कतिपय कार्यक्रमहरुमा अनियमितता देखिएको भन्दै बिगतमा भएका कमिकमजोरीहरु सच्याउदै आगामि दिनमा पारदर्शी रुपमा काम गर्नुपर्नेमा जोड दिनु भएको थियो ।
बैठकमा मुख्यमन्त्री तथा मन्त्रीपरिषदको कार्यालयका सचिब भरतमणी सुवेदी,आर्थिक मामिला तथा योजना मन्त्रालयका सचिब बाबुराम अधिकारी,आन्तरिक मामिला तथा कानुन मन्त्रालयका सचिब रबिलाल पन्थ,सामाजिक विकास मन्त्रालयका सचिब महादेव पन्थ,भौतिक पूर्वाधार विकास मन्त्रालयका सचिब सुशिलचन्द्र तिवारी,उद्योग,पर्यटन,वन तथा वातावरण मन्त्रालयका सचिब राजेन्द्र केसी,प्रदेश लेखा नियन्त्रण कार्यालय प्रमुख दीपक ज्ञवाली,भूमि व्यवस्था कृषी तथा सहकारी मन्त्रालयका महाशाखा प्रमुख श्रीधर ज्ञवालीले आ आफ्नो मन्त्रालय तथा मातहतका कार्यालयहरुमा रहेको बेरुजु र फछ्र्योटमा भएको प्रगतिबारे जानकारी गराउनु भएको थियो ।
महालेखा परीक्षकको कार्यालयले लुम्बिनी प्रदेश सरकार अन्तर्गत सञ्चालित योजना तथा कार्यक्रमहरुको ९४ करोड ७३ लाख ७२ हजार रुपयाँ बेरुजु रहेको औल्याएको थियो ।
