बुटवल ४ कार्तिक
संघीय सरकारले कोरोना संक्रमितको मृत्यु भएपछिको शव व्यस्थापन र पीसिआर परिक्षण नगर्ने घोषणा गरेकोमा सरकारलाई चुनौती दिदै रुपन्देहीको तिलोत्तमा नगरपालिकाले कोरोना संक्रमणबाट मृत्यु भएका नगरबासीको शव व्यवस्थापनको जिम्मा लिने निर्णय गरेको छ ।
कार्यवाहक नगर प्रमुख जगेश्वरदेवी चौधरीको अध्यक्षतामा मंगलबार बसेको कोभिड संकट व्यवस्थापन केन्द्र (सिसिएमसी) को बैठकले कोरोना संक्रमणबाट मृत्यु भएका नगरबासीको शव व्यवस्थापन नगरपालिका आफैंले गर्ने निर्णय गरेको हो ।
यसअघि शव व्यवस्थापनको काम सम्बन्धित पालिकाको सहयोगमा नेपाली सेनाले गर्दै आएको थियो ।
शव व्यवस्थापनको जिम्मेवारीबाट संघीय सरकार पछि हटेपछि तिलोत्तमा नगरपालिकाले त्यसको जिम्मेवारी लिएको हो । सरकारलाई चुनौती दिदै तिलोत्तमानगरपालिकाले संभवत नेपालमै स्वागत योग्य काम गरेको नगरवासीले महशुष गरेका छन ।
सरकारले पीसिआर परिक्षण र संक्रमितको मृत्युपछि शवको व्यवस्थापनवाट हातझिकेसंगै सरकारको चौतर्फी आलोचना भैरहेको समयमा नगरपालिकाले गरेको निर्णय साहषिक र नागरिक प्रतिको जवाफ देहि भएको नगरका सामाजिक एभियान्ता कमल पाठकले बताउनु भयो ।
तिलोत्तमा नगरपालिकाले जे गर्छ त्यो मुलुकवासीले अनुसरण गर्ने काम गरेको छ भन्दै अर्का समाजसेवी रामु भण्डारीले संघीय सरकारले तिलोत्तमा नगरपालिकावाट पाठ सिक्न आग्रह गर्नु भयो । नगरपालिकाले नगर क्षेत्रभित्र प्लास्टिक मुक्त शहर, हरियाली सडक, लगायतका नमूना काम गरि नेपालमै अग्रणी स्थानको स्थानिय तहका रुपमा चिरपरिचित भएको छ । काठमाण्डौ बाहिर पहिलोपटक लगानी सम्मेलन गरि नगरमा लगानीका अवसर समेत श्रृजना गरेको नगरपालिका हो तिलोत्तमा त्यसैले पनि यसको चर्चामात्र गरेर पुग्दैन यसले गरेका कामको अनुशरण गर्न संघीय सरकारका ध्यान जान जरुरी रहेको नगरवासिले महशुष गरेका छन ।
बैठकले शव व्यवस्थापनको आवश्यक तयारी गर्न स्वास्थ्य शाखालाई जिम्मेवारी दिएको छ । तिलोत्तमामा मंगलबारसम्म कोरोना संक्रमणबाट ८ जनाको मृत्यु भएको छ । हालसम्म तिलोत्तमाका ७२६ जनालाई कोरोना संक्रमण भएकोमा ३९३ जनाले स्वास्थ्य लाभ गरिसकेका छन् भने ३२५ जना सक्रिय संक्रमित छन् ।
बैठकले कन्ट्रयाक्ट ट्रेसिङमा परेका नगरबासीको पहिलो पटकको परीक्षण समेत निःशुल्क गर्ने निर्णय गरेको छ । संक्रमितको कन्ट्रयाक्ट ट्रेसिङमा परेर लक्षण देखिएकाहरुको नगरपालिकाको खर्चमा पिसिआर परीक्षण गर्न सरकारी प्रयोगशालासँग सम्झौता गर्ने निर्णय बैठकले गरेको हो । संघीय सरकारले सबैको पिसिआर परीक्षण समेत निःशुल्क नगर्ने निर्णय सार्वजनिक गरिरहँदा तिलोत्तमा नगर सरकारले त्यसको जिम्मेवारी समेत आफैंले लिने निर्णय गरेको हो ।
यस्तै नगरपालिकाले शंकरनगर आइसोलेशन सेन्टरमा अक्सिजन सिलिन्डरको संख्या थप गर्ने निर्णय समेत गरेको छ । कोरोना संक्रमितले अक्सिजनको अभावमा मृत्युवरण गर्न परिरहेका खबर आइरहँदा तिलोत्तमाले आइसोलेशनमा अक्सिजन सिलिन्डरको संख्या ६ बाट २० पुर्याउने निर्णय गरेको हो । हाल आइसोलेशनको क्षमता ४० बेड रहेकोमा बेडको संख्या पनि बढाउने निर्णय सिसिएमसी बैठकले गरेको कार्यवाहक नगर प्रमुख चौधरीले जानकारी दिनुभयो ।
हाल तिलोत्तमाको आइशोलेसनमा अन्य पालिकाबाट जाँच भइ आएका २२ जना संक्रमति छन् । बैठकले संक्रमितहरुलाई स्वास्थ्य लाभको कामना गर्दै घर–घरमा आयुर्वेदिक जडिबुटी पुर्याउने कार्यक्रमलाई निरन्तर दिने निर्णय समेत गरेको छ । बैठकमा प्रमुख प्रशासकीय अधिकृत माधव प्रसाद शर्माले कोरोना महामारी सुरु भएपछि संघीय सरकारबाट संक्रमण रोकथाम, उपचार तथा राहतको लागि २ लाख र प्रदेश सरकारबाट १५ लाख रुपैंयाँ नगरपालिकाको खातामा आएको जानकारी दिनुभयो ।
बैठकले दसैं–तिहार पर्वमा बाहिरी जिल्ला तथा भारत एवं तेस्रो मुलुकबाट नगरपालिकामा आउने नगरबासीलाई स्वास्थ्य प्रोटोकललाई ख्याल राख्दै सिधैं समाजमा घुलमिल नहुन आग्रह गरेको छ । साथैं बैठकले कोरोना संक्रमितहरुको शीघ्र स्वास्थ्य लाभको कामना सहित मृत्यु भएकाको चीर शान्ति एवं शोकसन्तप्त परिवारजनमा समवेदना प्रकट गरेको गरेको छ ।