कोरोना परिक्षण र उपचारवाट सरकारले हात झिक्नु नागरिकप्रति गैरजिम्मेवार :रुपन्देही व्यापार संघ

बुटवल ३ कार्तिक
रुपन्देही व्यापार संघले कोरोना भाइरस संक्रमितको परिक्षण तथा उपचार गर्ने दायित्वबाट सरकार पछि हट्ने भनि गरेको निर्णयप्रति गम्भिर ध्यानाकर्षण भएको जनाएको छ ।
सोमवार संघका अध्यक्ष यमलाल लोहनीले जारी गरेको विज्ञप्तिमा सरकारले जनताको जिवन रक्षामा ध्यान केन्द्रीत गरी जिम्मेवार बन्नु पर्ने अवस्थामा ठिक उल्टो हात उठाएर परिक्षण र उपचारमा संलग्न नहुने घोषणा गर्न पुगेको घटनालाई सरकारको नागरिकप्रति गैर जिम्मेवार बनेको जनाएको छ ।
संघले यो नीतिले कोरोनाको परिक्षण र उपचारमा प्रभाव पर्ने एवं कोरोनाले भयावह निम्त्याउने उल्लेख गर्दै सरकारलाई आफ्नो यो निर्णय तत्काल फिर्ता गरी आम नेपालीको निःशुल्क परिक्षण र उपचारको व्यवस्था गर्न जोडदार माग गरेको छ ।
विज्ञप्तिमा सरकारको पछिल्लो निर्णय कानून र सर्वोच्च अदालतको आदेश विपरीतसमेत रहेको उल्लेख गर्दै कोरोनाको महामारीका बेला जनताको उपचारमा पर्याप्त ध्यान दिन नसक्ने सरकारले सांसदहरुलाई दशै भत्ता र अन्य सुविधा दिने काम गरेकोमा आपत्ति प्रकट गरिएको छ ।
संघले विज्ञप्तिमार्फत उद्योगी व्यवसायीहरुबाट उठाएको राजश्वलाई राष्ट्र र जनताको हितमा लगानी गर्नुपर्ने अवस्थामा व्यक्तिगत लाभमा बाडफाड गर्ने जुन काम भएको छ त्यो तत्काल बन्द गरी दशैभत्ता खारेज गर्न समेत माग गरिएको छ ।
संघले सम्पूर्ण तहका सांसद, स्थानीय जनप्रतिनिधिले महामारीको अवधिमा तलव भत्ता नलिने घोषणा गर्न तथा स्वास्थ्य र सुरक्षावाहेकका कर्मचारीको काम घटेको अवस्थामा हाल खाइपाइ आएको तलव भत्ता कटौती गरी सर्वसाधारणको उपचारमा खर्च गर्न पनि आग्रह गरेको छ ।