सटर व्यवसायीको १ वर्ष म्याद थप गर्न बुटवल उप महानगरपालिकालाई रुपन्देही व्यापार संघको आग्रह

बुटवल २१ असोज
रुपन्देही व्यापार संघले बुटवल उपमहानगरपालिको हाटवजारमा सटर भाडामा लिएर व्यापार व्यवसाय गरेका व्यवसायीहरुको १ वर्ष म्याद थप गरिदिन माग गरेको छ ।
नगरपालिकाको हाटवजारमा रहेका सटरभाडामा लिएका व्यवसायीहरुको सम्झौताको म्याद सकिएको हुदांँ बर्तमान कोरोनाका कारण लामो समय बन्द भएकोले नयाँ टेन्डर नगर्न अनुरोध गर्दै कम्तीमा संँझौताको म्याद १ बर्ष थप्न माग गरेको छ । संघको सचिवालयमा बसेको कार्य समिति बैठकले सो निर्णय गरेको संघले जनाएको छ ।
बैठकले संघको स्थापना भएको दिन पारेर आफ्नो १९ औं बार्षिक साधारणसभा आगामी कार्तिक २८ गते गर्ने निर्णय गरेको महासचिव दयानिधि भण्डारीले बताउनु भयो ।
राज्यले कोरोना संक्रमण नियन्त्रणका लागि तय गरेको स्वास्थ्य नीति तथा नियमको पालना गरि साधारणसभा गर्ने निर्णय संघले गरेको जनाएको छ ।
यसैगरि संघले यही असोज २७ गते नेपाल चेम्वर अफ कमर्सको स्थापना दिवशको अवसरमा संघको सचिवालयमा रक्तदान गर्ने निर्णय गरेको छ । रक्तदान कार्यक्रम सम्पन्न गर्न महासचिव दयानिधि भण्डारीको संयोजकत्वमा एक समिति गठन गरेको छ ।
बैठक संघका अध्यक्ष यमलाल लोहनीको अध्यक्षतामा सम्पन्न भएको थियो ।