तिलोत्तमा, १० असोज । सत्याग्रही डाक्टर गोविन्द केसीको समर्थनमा आज शनिबार रुपन्देहीको तिलोत्तमामा विरोध प्रदर्शन भएको छ । डाक्टर केसीका सबै मागहरु पूरा गर्नुपर्ने र उनको जीवन रक्षा गर्नुपर्ने लगायतका माग गर्दै युवायुवतीहरुले बिहान ९ बजेदेखि १० बजेसम्म मणिग्राम चोकमा विरोध प्रदर्शन गरेका हुन् ।
जिल्लाका विभिन्न क्षेत्रबाट स्वतस्फुर्त रुपमा मणिग्राम चोकमा जम्मा भएका युवायुवतीहरुले मेडिकल शिक्षा र स्वास्थ्य क्षेत्रमा भएको माफियागिरी अन्त्य गर, लुटतन्त्र बन्द गर, कर्णालीमा एमबीबीएस पढाइ सुरु गर लगायत डा. केसीको समर्थनमा लेखिएका नारा लेखिएका प्लेकार्डसहित प्रदर्शन गरेका हुन् ।
प्लेकार्डमा सरकार आफ्नो नियत सच्याउ, डाक्टर गोबिन्द केसी को जीवन रक्षा गर, राज्य आतंक बन्द गर, केपी ओलीको मिसन–सिटामोलमा कमिसनलगायतका नाराहरु लेखिएको थियो ।
नेपाल तरुण दलका रुपन्देही जिल्ला सदस्य लक्ष्मण गौतम र युवा नेता गणेश पाठकको संयोजनमा भएको प्रदर्शनमा सहभागीहरुले आम नागरिकको प्रजातान्त्रिक अधिकार भएको मुलुकमा बल प्रयोग गरी अनसनरत डाक्टर केसीमाथि गरिएको अभद्र व्यवहारको बिरोध गरेका थिए ।
चिकित्सा शिक्षा सुधारका विभिन्न माग राख्दै डा. केसीले गत भदौ २९ गतेदेखि जुम्लामा १९ औं पटक अनसन बस्नु शुरु गर्नुभएको हो । डा. केसीले कर्णाली स्वास्थ्य विज्ञान प्रतिष्ठानमा एमबीबीएस कार्यक्रम सुरु गर्नुपर्ने, मास्कको प्रयोग र सामाजिक दूरी अनिवार्य गर्दै पीसीआर परिक्षण व्यापक बनाएर निषेधाज्ञा र लकडाउन अन्त्य गर्नुपर्ने माग राख्नु भएको छ ।
यस्तै राज्य लक्ष्मी गोल्छा घुस काण्ड, आयल निगम जग्गा खरिद काण्ड, वाइड बडी काण्ड, सेक्युरिटी प्रेस खरिद काण्ड, दरबारमार्गको जग्गा काण्ड, ओम्नी समूहको औषधि खरिद काण्ड लगायत सबै ठूला भ्रष्टाचार काण्ड र बालुवाटार जग्गा काण्डका दोषीलाई कानुन बमोजिम छानविन र कारवाही गर्न पनि डा. केसीले माग गर्नुभएको छ ।
