रामकुमार श्रेष्ठ
नवलपरासी, ७ भदौ । पश्चिम नवलपरासीमा पाल्ही नन्दन गाउँपालिका अध्यक्ष सहित समुदायका २९ जनामा कोरोना भाइरस पुष्टि भएको छ ।
पाल्हीनन्दन गाउँपालिकामा अध्यक्ष लगायत कर्मचारीमा समेत कोरोना भाइरस पुष्टि भएको हो । जनप्रतिनिधि र कर्मचारीमा समेत कोरोना भाइरस देखिएपछि गाउँपालिकाको कार्यालय शिल गर्ने तयारी गरिएको छ ।
स्वास्थ्य कार्यालय पश्चिम नवलपरासीका अनुसार पाल्हीनन्दन गाउँपालिकामा मात्रै २५ जना र जिल्ला अस्पताल परासीका ३ जना डाक्टर र १ जना नर्स सहित ४ जना स्वास्थ्यकर्मीमा कोरोना भाइरस पोजेटिभ देखिएको हो । जिल्ला अस्पतालमा अहिले आकास्मिक सेवा बाहेकका अन्य सेवा बन्द गरिएको छ ।
परासी क्षेत्रमा एक सातादेखि निषेधाज्ञा जारी छ । निषेधाज्ञा १० गतेसम्मलाई थप गरिएको छ तथापि निषेधाज्ञाको पूर्ण रुपमा पालना हुन सकेको छैन । पश्चिम नवलपरासीमा यस अघि नेपाली काँग्रेस पश्चिम नवलपरासीका उपसभापति सुबासचन्द्र गिरीको कोरोनाकै कारण निधन भएको छ ।
