तिलोत्तमा, २५ साउन । तिलोत्तमा क्षेत्रमा विगत केही दिनदेखि भैरहेको अनियमित विद्युत कटौतीको विरोध गर्दै नेपाल तरुण दल तिलोत्तमा नगर समितिले नेपाल विद्युत प्राधिकरण नयाँमिल वितरण केन्द्रको ध्यानाकर्षण गराएको छ ।
गर्मी बढेका बेला प्राधिकरणले दैनिक जसो लाईन कटौती गर्दा र विजुली आइहाले पनि कम भोल्टेज आउने गरेका कारण विद्युतीय उपकरण पंखा, एसी, कुलर चलाउन नपाउँदा सर्वसाधारण समस्यामा परेको भन्दै नेपाल तरुण दल तिलोत्तमा नगर अध्यक्ष खिम क्षेत्रीको नेतृत्वमा गएको टोलीले नेपाल बिधुत प्रधिकरण नयाँमिल शाखा प्रमुख कमर आलम खानलाई ध्यानाकर्षण पत्र बुझाएको हो ।
कोभिड–१९ का कारण बन्दाबन्दी पुर्णरुपमा नखुलेको र उद्योग, कलकारखाना तथा होटल ब्यवसायहरु संचालन नभएको अवस्थामा पटक पटक विद्युत कटौती हुने र बिजुली आईहाले पनि अत्यन्त न्युन भोल्टेजको समस्या देखिनु लाई तरुण दलले विडम्वनाको रुपमा लिएको छ । गर्मी यामको समयमा भएको विद्युत कटौतीको समस्या बारे तत्काल छानविन गरी समाधान खोज्न तरुण दलले आग्रह गरेको छ ।
हाल भएका ट्रान्सफरमरहरुको के भि ए भोल्टको क्षमता बृद्धि गर्न आवश्यक भए थप के भि ए का ट्रान्सफरमरहरु उपलब्ध गराई विद्युत आपुर्तिमा सहजता र सहयोग गर्न नेपाल सरकार, नेपाल विद्युत प्राधिकरण केन्द्रिय कार्यालय र प्रधिकरणको क्षेत्रीय कार्यालयलाई तरुण दलले आग्रह गरेको छ ।
बजार क्षेत्रमा अव्यवस्थित रुपमा रहेका तारहरुका कारण आगलागी भई ठुलो दुर्घटना हुने तर्फ सचेत गराउंदै सो को उचित ब्यवस्थापन गर्न पनि तरुण दलले विद्युत प्राधिकरणलाई सचेत गराएको छ ।
