महिला संघको स्थापना दिवसमा अनाथ आश्रममा खाद्यान्न बितरण

बुटवल, २५ साउन । नेपाल महिला संघ रुपन्देहीले संघको ७३ औं स्थापना दिवसको अवसरमा अनाथ बालबालिकाहरुलाइ खाद्यान्न बितरण गरेको छ । महिला संघले शनिबार एक कार्यक्रमको आयोजना गरी तिलोत्तमा नगरपालिका मणिग्राममा रहेको आत्मशान्ति अनाथ आश्रममा रहेका बालबालिकाहरुलाई खाद्यान्न प्रदान गरेको हो ।
नेपाल महिला संघ रुपन्देहीका सभापति गंगा शाहीको सभापतित्वमा भएको कार्यक्रममा नेपाली काँग्रेसका जिल्ला सभापति अब्दुल रज्जाक, सचिव रामकृष्ण खाँण, जिल्ला सदस्य माया गौतम, मिना भण्डारीलगायतले चामल, दाल, तेल, लगायतका खाद्यान्न सामाग्री आश्रमका संचालक मैनादेवि भण्डारीलाइ हस्तान्तरण गर्नु भयो ।
खाद्यान्न बितरण कार्यक्रममा बोल्दै पार्टी सभापति रज्जाकले नेपालको राजनीतिक, सामाजिक र आर्थिक परिवर्तनमा महिलाहरुको ठुलो योगदान रहेको र त्यसको नेतृत्व नेपाल महिला संघले गर्दै आएको बताउनु भयो । उहांले सामाजिक क्षेत्रमा समेत महिला संघको योगदान अनुकरणिय रहेको बताउनु भयो ।
महिला संघका सभापति गंगा शाहीले राज्यका हरेक निकाय, सामाजिक क्षेत्र र पार्टी भित्रै पनि महिला अधिकार स्थापित गराउन महिला संघले महत्वपुर्ण भूकिमा खेल्दै आएको बताउनु भयो ।
महिला संघका सदस्य रुपा पुनको संचालन र विष्णु पराजुलीको स्वागतमा भएको कार्यक्रममा नेपाली काँग्रेसका जिल्ला सदस्य माया गौतम, मिना भण्डारी लगायतले बोल्दै स्वर्गीय महिला नेतृहरु मंगलादेवि सिंह, नोना कोइराला, शैलजा आर्चायको योगदानको चर्चा गर्नु भयो । स्वर्गीय मंगलादेवी सिंहले २००४ साल साउन २४ गते गठन गरेको नेपाल महिला संघ नेपाली काँग्रेसको सबैभन्दा जेठो भगिनी संस्था हो ।