हमालको घरमा भएको तोडफोडको घटनाप्रति तिलोत्तमा उद्योग वाणिज्य संघको विरोध

तिलोत्तमा, २३ साउन । बुटवल उपमहानगरपालिका वडा नं ९ कालिका पथ स्थित खिमबहादुर हमालको नाममा रहेको घर श्रावण २१ गते विहान बुटवल उपमहानगरपालिकाले डोजर लगाई प्रहरी घेराबन्दिमा भत्काएको कार्यप्रति तिलोत्तमा उद्योग वाणिज्य संघले ध्यानाकर्षण भएको जनाएको छ ।
बुटवल उद्योग बाणिज्य संघका अध्यक्ष समेत रहनुभएका हमालको विं.सं २०४६ सालमा बुटवल नगर पञ्चायतबाट नक्सा पास गराई घर निमार्ण भएको र आ.व. २०७६÷०७७ सम्मको कर समेत बुटवल उपमहानगरपालिकामा बुझाउदैँ आउनुभएकोमा विना जानकारी एकाएक डोजर चलाएर घर तोडफोड गरेको घटनाको संघले भ्रत्सना गरेको छ ।
तिलोत्तमा उद्योग बाणिज्य संघका अध्यक्ष गुणनिधि भण्डारी (माधव) ले बिहिबार प्रेस विज्ञप्ती जारी गरी बुटवल उपमहानगरपालिकाले सडक विस्तार कार्य प्रारम्भ गरे पश्चात घर धनी हमालले घर भत्काउँदा क्षतिपूर्ति दिनुपर्ने माग गर्दै आएपनि नगरपालिकाले वेवास्ता गरेको र क्षतिपूर्तिका लागि सर्वोच्च अदालतमा विचाराधिन मुद्दा फैसला समेत नभएको अवस्थामा अचानक घर भत्काउने कार्य निन्दनीय छ भन्नुभएको छ ।
विज्ञप्तिमा सर्वोच्च अदालतमा मुद्धाको पेशी तोकिएकै दिन बुटवल उपमहानगरपालिकाले सर्वोच्च अदालतको समेत मानहानी हुने गरी एउटा व्यक्तिको नैसर्गिक अधिकार समेत हनन हुने गरी गरिएको यस्तो कार्यको घोर विरोेध गर्दछौँ भनिएको छ ।
सम्मानित सर्वोच्च अदालतको गरिमामाथि नै आंच आउने यस्ता गतिविधिले जनमानसमा निराशाको वातावरण श्रजृना गरेको उल्लेख गर्दै विज्ञप्तिमा यसरी कानून विपरित यस्ता क्रियाकलाप नगर्न र पीडितलाई क्षतिपूर्ति प्रदान गरी कानुनी राज्यको सम्मान र पालना गर्न बुटवल उपमहानगरपालिका र स्थानीय प्रशासनसँग माग गरिएको छ ।
यस्तै बुटवल उद्योग बाणिज्य संघले पनि अदालतमा बिचाराधिन मुद्धामा अमानवीय शैलिमा घर भत्काउनु अभिभावकको रुपमा रहेको स्थानीय सरकारले न्यायालयको अपहेलना गर्नुका साथै जनताप्रति संवेदनहिन र बिधिको शासन विरुद्ध काम गरेको उल्लेख गरेको छ । घरमा भएको तोडफोडको घटनाको निष्पक्ष छानविन गर्न, अदालतको आदेश कुर्न र पीडित लाई उचित न्याय दिन संघले माग गरेको छ ।

संघका बरिष्ठ उपाध्यक्ष उज्जवल कसजुले जारी गरेको विज्ञप्तिमा संघका अध्यक्ष खिमबहादुर हमालको घरमा भएको अमानवीय कार्यको छानविन गर्न माग गर्दै डोजर लगाएर भत्काईएको घरको तत्काल उचित मुआब्जा सहित क्षतिपुर्ति प्रदान गर्न र दोषि उपर हदैसम्मको कारवाही गर्न सम्बन्धित निकायमा माग गरिएको छ ।
हमालको उक्त घर सम्बन्धि मुद्धा सर्वोच्च अदालतमा विचाराधिन रहेको र हिजो कै मितिमा पेशी रहेको अवस्थामा पेशीको समय समेत नकुरी एका बिहानै घरमा डोजर लगाउनुले न्यायालयको अपमान र व्यक्तिको नैसर्गिक अधिकारमाथि कुठाराघात भएको विज्ञप्तिमा उल्लेख छ ।
अघिल्लो दिन राती मात्र सडक निर्माण समितिका संयोजक तथा नेकपा बुटवल नगर समितिका अध्यक्ष बाबुराम पन्थी र रुपन्देही ब्यापार संघका अध्यक्ष यमलाल लोहनी घर सम्वन्धि मुद्धा फिर्ता लिन आग्रह गर्दै हमालको घरमा पुगेको र हमालले सहमतिका लागि मागेको समय सिमा भन्दा अगावै विना पूर्व सूचना एकाविहानै घरमा डोजर लगाउनुले घर परिवारलाई आतंकित पार्ने, घर भत्काई धनमालको समेत क्षति पुर्याउने र प्रतिशोध सांध्ने नियत प्रष्ट रुपमा देखिएको विज्ञप्तिमा उल्लेख गरिएको छ ।