सामाजिक क्षेत्रमा अझै सक्रिय भूमिका खेल्न रोटरीयनलाई सुझाव

बुटवल, १० साउन
सामाजिक क्षेत्रमा क्रियाशिल अन्तर्राष्ट्रिय संस्था रोटरीद्वारा रोटरी डिष्ट्रिक्ट ३२९२ रिजन पाँच अन्तर्गतका अध्यक्ष तथा पदाधिकारीहरुलाई तालिम प्रदान गरिएको छ । रोटरी डिष्ट्रिक्ट ३२९२ रिजन पाँच अन्तरगतका रोटरी क्लब अफ बुटवल, रोटरी क्लव अफ लुम्बिनी स्टार्स, रोटरी क्लव अफ सेन्ट्रल रुपन्देही र रोटरी क्लव अफ बुटवल चौतारीका अध्यक्ष तथा पदाधिकारीहरुलाई तालिम प्रदान गरिएको हो ।
तालिममा प्रत्येक क्लबबाट अध्यक्ष, सचिव र कोषाध्यक्षहरु लगायत चेयरहरुको सहभागिता रहेको थियो । विगतका वर्षहरुमा यस क्षेत्रका सबै क्लबहरुलाई एकैपटक सहभागी गराउँदै आएकोमा यस वर्ष भने कोरोना सतर्कतालाई मध्यनजर गर्दै रिजन पाँच अन्तर्गतका २६ वटा क्लवलाई ६ वटा समूहमा विभाजन गरी तालिम (सेमिनार) प्रदान गरिएको रोटरी डिष्ट्रिक्ट ३२९२ जोन १९ का एसिष्टेण्ट गभर्नर तथा कार्यक्रम संयोजक खिमानन्द भुसालले बताउनु भयो ।
तालिममा रोटरी डिष्ट्रिक्ट ३२९२ रिजन पाँचका तालिम उपसमितिका चेयर लक्ष्मण ज्ञवालीले सहजिकरण गर्नु भएको थियो ।
सो अवसरमा बोल्दै उहाँले तालिममा लिएको ज्ञान सीपलाई व्यबहारमा उतार्दै सामाजिक काममा लगाउन आग्रह गर्नु भयो । सेमिनारलाई प्रविधिमार्फत भर्चूअल रुपमा रोटरी डिष्ट्रिक्ट ३२९२ का डिष्ट्रिक्ट गभर्नर राजिव पोखरेल र तालिम कमिटी चेयर राजेन्द्र शाक्यले समेत सम्बोधन गर्नु भएको थियो ।
त्यस अवसरमा डिष्ट्रिक गभर्नर पोखरेलले रोटरीले सामाजिक क्षेत्रमा खेलेको भूमिका सधै अग्रणी र प्रभावकारी रहेको भन्दै आफ्नो कर्तव्य सम्झेर सामाजिक क्षेत्रमा क्रियाशिल हुन र रोटरीको छविलाई सधै बचाइ राख्न आग्रह गर्नु भयो ।
रोटरी क्लब अफ बुटवलका अध्यक्ष सुनिल श्रेष्ठको अध्यक्षतामा भएको कार्यक्रममा जोन–१९ का एसिष्टेण्ट गभर्नर खिमानन्द भुसाल, रोटरी लुम्बिनी स्टार्सका बालकृष्ण पाण्डे लगायतले धारणा राख्नु भएको थियो ।