बुटवल, ५ साउन । ईनरह्विल क्लब अफ बुटवलको वर्ष २०२०÷२१ को पहिलो वोर्ड तथा २५५ औं नियमित बैठक बुटवलमा सम्पन्न भएको छ । बैठकले क्लबको आगामी कार्यक्रमका बारेमा निर्णय गर्नुकासाथै विगतको समिक्षा गरेको छ ।
क्लबका नवनिर्वाचित अध्यक्ष शोभा जोशीको अध्यक्षतामा बसेको बैठकले क्लब लेवलको योजना तर्जुमा तालिम तथा हिन्दु महिलाहरुको महान चाड हरितालिका तीजका अवसरमा तीज मिलन कार्यक्रम आयोजना गर्ने निर्णय गरेको छ । बैठकले क्लब लेवलको योजना तर्जुमा तालिमका लागि निर्मला श्रेष्ठलाई तथा तीज मिलन कार्यक्रमका लागि अम्बिका श्रेष्ठलाई संयोजक तोकेको अध्यक्ष जोशीले बताउनु भयो ।
बैठकमा क्लबको १७ औ पद हस्तान्तरण तथा १८ औ स्थापन दिवश कार्यक्रमको प्रतिवेदन रुपा भण्डारीले प्रस्तुत गर्नु भएको थियो । बैठकमा क्लबले गरेका कामको बारेमा समिक्षा गर्नुकासाथै नया सदस्यताको लागि प्रक्रिया सुरु गर्ने निर्णय भएको जनाइएको छ । बैठकले क्लबका पूर्व अध्यक्ष शान्ता शाक्यको क्लबलाई बुझाउनु पर्ने शुल्क उहांलाई सम्मान गर्दै मिनाहा गर्ने निर्णय गरेको अध्यक्ष जोशीले बताउनु भयो ।
बैठकका अवसरमा उच्च शैक्षिक सफलता हासिल गर्ने एवं विभिन्न क्लबहरुमा निर्वाचित हुन सफल ईनरह्विल क्लबका सदस्यका छोरीहरु श्रृष्टि गुरुङ, सोनाली गुरुङ, स्मारिका श्रेष्ठ, त्रिसना श्रेष्ठ र विनिता ज्ञवालीलाई सम्मान गरिएको थियो ।
कार्यक्रममा ईनरह्विल क्लव डिष्ट्रिक ३५० का निवर्तमान डिष्ट्रिक चेयरमेन समिरा ध्वजु, वर्ष २०१९÷२० का अध्यक्ष प्रमिला श्रेष्ठ, पूर्व अध्यक्षहरु भारती जोशी, सरस्वती श्रेष्ठ, क्लब डाइरेक्टर राधिका गुरुङ लगायतले बोल्दै महिलाहरुको क्षमता विकास र उनीहरुलाई आत्मनिर्भर बन्नका लागि प्रेरित गर्ने खालका कार्यक्रमहरु गर्न क्लवलाई सुझाव दिनु भएको थियो ।
सो अवसरमा बोल्दै अध्यक्ष जोशीले क्लबको नियमित कार्यक्रमलाई व्यबस्थित बनाउने र महिलाहरुको क्षमता अभिबृद्धिका साथै शिक्षा, स्वास्थ्यसहित सामाजिक गतिविधिका कामलाई प्राथमिकतामा राखेर अगाडी बढ्ने लक्ष्य लिएको हुदा अग्रजहरुको साथ र सहयोगको अपेक्षा गर्नुभयो । कार्यक्रमको सञ्चालन सचिव सम्झना ज्ञवालीले, स्वागत मञ्जु श्रेष्ठ र धन्यवाद ज्ञापन गंगा श्रेष्ठले गर्नु भएको थियो ।
