बुटवल १९ असार
अविरल वर्षाका कारण गुल्मी जिल्लाका विभिन्न स्थानमा पहिरो जादा मानविय संगै ठुलो मात्रामा क्षति भएको छ ।
त्यस्तै जिल्लाको इस्मा गाउँपालिका वडा नम्बर एक मल्लीमा पहिरोमा परि १८ महिनाका शिशु सुरज सारुको ज्यान गएको छ ।
त्यस्तै सोही स्थानकी वर्ष २७ कि ईश्वरी खत्री गम्भिर घाईते भएकी छन भने उनकी छोरी अपेक्षा खत्री बेपत्ता भएकी छन । साथै बेपत्ता हुनेको संख्या बढ्न सक्ने अनुमान गरिएको छ ।
यता मुसिकोट नगरपालिका वडा नम्बर दुईमा पनि ठुलो मात्रा मा क्षति भएको छ । विभिन्न स्थानमा पहिरो जाँदा घरहरु विस्थापित भएको जिल्ला प्रहरी कार्यालय गुल्मीका प्रहरी नायब उपरीक्षक केदारराज पन्तले बताउनु भयो । त्यस्तै वडा नम्बर वडा नम्बर दुईमा पसल बगाउँदा एक जना बेपत्ता भएका छन ।
इश्मा गाउँपालिका–४ मा रहेको एक सामुदायिक विद्यालयमा पहिरोले क्षति गरेको छ । डीएसपी पन्तका अनुसार पहिरोले कालिका निमाविको नौ वटा कोठा पुरिदिएको छ ।
उहाँका अनुसार सोही क्षेत्रमा पहिरोका कारण १३ घर परिवार जोखिममा छन् ।
गुल्मीको मुसीकोट नगरपालिका–२ मा पहिरोका कारण दुई घर परिवार विस्थापित भएका छन् ।
मुसीकोट नगरपालिका–२ राताचौर बस्ने जनक केसीको घर पहिरोले भत्काईदिँदा ५ जनाको परिवार विस्थापित भएका हुन् ।
यस्तै पहिरोको जोखिमका कारण सोही ठाउँ बस्ने चुमानसिंह बस्नेतको ६ जनाको परिवार विस्थापित भएका छन् ।
मुसीकोट नगरपालिका–२ हरथोक अम्राहीमा तीन वटा गोठ र खोर बगाउँदा सात वटा भैंसी र ११ वटा बाख्रा बगाएको छ ।
डीएसपी पन्तका अनुसार हरथोक अम्राहीका रामबहादुर सुनारको गोठ पहिरोले बगाउँदा ३ वटा भैँसी र ७ वटा बाख्रा पुरेको छ ।
यस्तै सोही ठाउँका अर्जुन बहादुर सिंहको गोठ बगाउँदा एउटा भैँसी र ४ वटा बाख्रा र टेकबहादुर कार्कीको ३ वटा भैंसी पुरेको छ ।
अविरल वर्षा र ठाउँ ठाउँमा पहिरो जादा उद्दार गर्न कठिनाइ भएको जिल्ला प्रहरी कार्यालय गुल्मीले जनाएको छ ।
