आज असार १५, राष्ट्रिय धान दिवस

बुटवल, १५ असार । आज असार १५ । अर्थात राष्ट्रिय धान दिवस । असार १५ लाई दही चिउरा खाने दिनका रुपमा पनि मनाउने गरिन्छ । आजको दिनलाई धान दिवसका रुपमा मनाउने गरिन्छ । देशका विभिन्न जिल्लामा रोपाइँसँगै विभिन्न कार्यक्रमहरु गरेर राष्ट्रिय धान दिवस मनाइँदैछ । नेपालमा वि.सं. २०६२ साल यता असार १५ लाई राष्ट्रिय धान दिवसका रूपामा मनाउन थालिएको हो ।
कृषि प्रधान देश भएर पनि कृषिमा बढ्दो परनिर्भरतालाई हटाउन नेपालको प्रमुख खाद्यबालीका रुपमा रहेको धानको महत्व र उत्पादनमा बृद्धिका लागि यो दिवसले थप हौसला प्रदान गरेको छ ।
नेपाल कृषिप्रधान देश भएकाले अधिकांश नेपाली यतिबेला कृषि कर्ममा छन् । खाद्यवालीमा बर्षे बाली मानिने धान नेपालभरी नै लगाइन्छ । असार, मानो रोपेर मुरी उब्जाउने समय भएको र अहिले पानी पनि समयमै परेकाले अधिकांश किसानहरु धान रोप्न ब्यस्त छन् । आजको दिन रोपाहार, हली–बाउसे खेतमा रोपाइँ गर्दै एकापसमा हिलो छ्यापाछ्याप गरेर रमाउने गर्दछन् ।
आज खेतखेतमा रोपाँईको चटारो देखिन्छ भने रोपाँई गरिसकेका किसानले खेतमा गएर दहि चिउरा खाने गर्दछन् । यसरी दहि चिउरा खाँदा शरीरलाई उर्जा र शितलता प्राप्त हुने विश्वास गरिन्छ । छुपुछुपु धानको विउ रोप्दै असारे भाखामा गीत गाएर रमाईलो पनि गर्ने गरिन्छ ।