हात गुमाएकी चौधरीलाई बिटाको सहयोग

बुटवल,१७ जेठ
मेसिनमा कामको सिलसिलामा दुर्घटना हुंदा एउटा हात गुमाएकी सैनामैना–४ की मिना चौधरीलाई बुटवल टेक्निकल इन्स्टिच्युट टे«ड्समेन एशोसिएसन (बिटा) ले आर्थिक सहयोग गरेको छ ।
बिटा केन्द्रीय समितिको आव्हानमा देशका बिभिन्न स्थानमा कार्यरत बिटा सदस्यहरूबाट संकलन गरिएको एक लाख पैसठ्ठी हजार तीन सय तीस रुपैयां चौधरीको घरमै पुगेर हस्तान्तरण गरिएको हो ।
२०७६ साल कार्तिक महिनामा बुटवल औद्योगिक क्षेत्रस्थित एसके इन्जिनियरिङमा कामको शिलशिलामा आफुले चलाइरहेको मेसिनमा दुर्घटनामा पर्दा चौधरीले दाहिने हात गुमाएकी थिएन् ।
सहयोग रकम हस्तान्तरण कार्यक्रममा सैनामैना नगरपालिका वडा नं. ४ का वडाध्यक्ष धनबहादुर कार्कीले बिटाले गरेको आर्थिक सहयोगप्रति धन्यवाद ज्ञापन गर्दै वडा र नगरपालिकाबाट पनि यथासक्य सहयोग गर्ने प्रतिबद्धता जनाए । कार्यक्रममा बिटाका राष्ट्रिय अध्यक्ष प्रदीप गिरीले दुःखको बेला आफ्ना सदस्यलाई सहयोग गर्नु संस्थाको कर्तव्य भएको र आगामी दिनमा पनि समस्यामा पर्ने सदस्यहरुलाई सहयोग गरिरहने प्रतिबध्दता ब्यक्त गरे । सो अवसरमा बिटाका उपाध्यक्ष सुर्य सोमै थापा, सहसचिव गुप्तबहादुर पुन, कोषाध्यक्ष नरमती थापा, सदस्यहरू ओम दर्लामी मगर र तिलिसरा दर्लामी मगरको पनि उपस्थिति रहेको थियो ।