नवलपरासी, १३ बैशाख । मस्जिद–मदरसा जिल्लास्तरीय अनुगमन समितिले पश्चिम नवलपरासीको रामग्राम नगरपालिका २ परासीको जामिया मस्जिदमा अनुगमन गरेको छ ।
विश्वभरी फैलिरहेको कोरोना भाईरसको संक्रमण रोकथामका लागि नेपाल मुस्लिम आयोगद्वारा गठित समितिले सो जामिया मस्जिद र मदरसामा अनुगमन गरेको हो । समितिका संयोजक भेष बहादुर खराल (ईस्हाक)को संयोजकत्वमा जिल्ला प्रशासन कार्यालयको रोहबरमा उक्त मस्जिद र मदरसाको अनुगमन भएको मस्जिदका ईमाम मौलाना सैयद गुलाम हुसैन मियाले जानकारी दिनुभयो ।
देशका विभिन्न मस्जिद र मदरसाहरुमा तब्लिगी जमातका धर्मावलम्बीहरु लुकेर बसेको र उनीहरुमध्ये कोई कोरोना भाइरस संंक्रमित भए उनीहरुबाट समाज र समुदायमा संक्रमण फैलिन सक्ने भएको हुँदा आयोगले देशभरिकै मस्जिद मदरसाहरु अनुगमन गर्न जिल्ला स्तरिय समितिहरु बनाई समितिले मस्जिद र मदरसाहरु अनुगमन गरिरहेको छ ।
त्यसै सन्दर्भमा शनिबारबाट नवलपरासीको उक्त मस्जिद र मदरसाबाट अनुगमन शुरु गरिएको हो ।
समितिका संयोजक खरालको संयोजकत्वमा जिल्ला प्रशासन कार्यालयका प्रमुख जिल्ला अधिकारी बासुदेव दाहाल, नेकपा जिल्ला संयोजक भविश्वर तिवारी, अनुगमन समिति सदस्य हैदर अलि मोमिन, करम हुसैन अंसारी, ईजहार मिया, वडा नम्वर २ का वडा सदस्य सुनिता श्रेष्ठ र जनता समाजवादी पार्टीका उपाध्यक्ष अमिरुल्लाह मिया लगायतको टोलीले मस्जिद र मदरसाको अनुगमन गरेको हो ।
प्रमुख जिल्ला अधिकारी दाहालले अनुगमनको क्रममा मस्जिदमा कुनै पनि बाहिरी व्यक्ति लुकेर बसेको नभेटिएको बताउदै अनुगमनको क्रममा मस्जिदमा कोही बाहिरी व्यक्ति आए तत्काल जिल्ला प्रशासन कार्यालयलाई बुझाउन मस्जिदका ईमाम मियालाई आग्रह गर्नुभयो । प्रमुख जिल्ला अधिकारी दाहालले मुस्लिम समुदायको रमजान पर्वको शुभकामना दिदै मस्जिदमा भिडभाड नगर्न, घरमै नमाज पढ्न र लकडाउनको पुर्ण रुपले पालना गर्दै कोरोना भाइरसको संक्रमण रोकथामका लागि सामाजिक दुरी कायम राख्न आग्रह गर्नुभयो ।
आयोगले नवलपरासीका पश्चिम र पुर्व जिल्लामा रहेका मस्जिद मदरसाहरु अनुगमन गर्नका लागि भेष बहादुर खरालको संयोजकत्वमा ७ सदस्यीय जिल्ला स्तरीय समन्वय समिति गठन गरेको छ । समितिका सदस्यहरुमा करम हुसैन अन्सारी, हैदर अलि मोमिन, ईजहार खान, तबारक मिया, एैनुल अन्सारी, जिया खान, मौलाना नजरुद्धिन मिया रहेका छन् । अनुगमनको क्रममा मस्जिद मदरसामा कोही ब्यक्ति लुकेर बसेको भेटिएमा तत्काल जिल्ला प्रशासन कार्यालयमा खवर गर्न वा बुझाई अवस्था हेरेर क्वारेन्टाईनमा राख्ने ब्यवस्था मिलाइने संयोजक खरालले बताउनु भयो । जिल्लामा रहेका ५५ वटा मस्जिद र ४३ वटा मदरसाहरुलाई अनुगमन गर्न एउटा रोडम्याप बनाएर अनुगमन गरिने अनुगमन समितिका सदस्य हैदर अलि मोमिनले बताउनु भयो ।
