गुल्मी, ८ वैशाख । गुल्मी जिल्लाको चन्द्रकोट गाउँपालिका वडा नम्बर ४ शान्तिपुर बजार स्थित एक पसलमा आगलागी हुँदा एक जनाको ज्यान गएको छ भने लाखौंको क्षती भएको छ । सोमबार विहान पसलमा आगलागी हुंदा बाग्लुङ बरेखानीका जनप्रतिनिधि समेत रहनुभएका पूर्ण खनालका १६ वर्षिय कान्छा छोरा समिर खनालको ज्यान गएको शान्तिपुर प्रहरी चौकीले जनाएको छ ।
आगलागीमा परी वडा अध्यक्ष खनाल सहित उहांकी श्रीमती र जेठा छोरा घाईते भएको प्रहरीले जनाएको छ । प्रहरीका अनुसार घाईते तिनै जनाको पाल्पा स्थित मिसन अस्पतालमा उपचार भइरहेको छ ।
खनाल सहित उहांकी श्रीमती र जेठा छोरा माथिल्लो तलामा रहेकाले आगलागि हुनासाथ छिमेकीको घरमा हामफालेर ज्यान जोगाउन सफल भए भने कान्छा छोरा समिर घरको पसल भएको सटरमा रहेको र तल्लो तलाबाटै आगलागि शुरु भएकाले उनलाई बचाउन नसकिएको प्रहरीले जनाएको छ ।
बाग्लुङ बरेखानीका खनाल परिवारले विगत ७ बर्ष देखि गुल्मीको शान्तिपुरमा व्यापार व्यवसाय गर्दै आएको थियो । खनालको पसलमा सोमवार विहान करिव साढे ११ बजेको समयमा अकस्मात आगलागि भएको प्रहरीले जनाएको छ ।
पसलमा आगलागि हुंदा पसलको गोदामसँगै पसलका सबै सामान जलेर नष्ट भएको र २० लाख बढिको क्षती भएको हुनसक्ने प्रहरीको प्रारम्भिक अनुमान छ ।
बिहान लागेको आगो दिउसो २ बजे मात्र नियन्त्रणमा आएको थियो । शान्तिपुर प्रहरी चौकी, मजुवा प्रहरी चौकी, बाग्लुङको नयाँ बजार प्रहरी चौकी र शान्तिपुरका स्थानीयबासीले आगो नियन्त्रणमा लिएका थिए । डिजल, पेट्रोल र मटितेललगायतका अति प्रज्वलनशिल पदार्थ भएका कारण खनाल परिवारका एक जना सदस्यलाई बचाउन नसकिएको प्रहरीले जनाएको छ । प्रहरीका अनुसार लकडाउनको अवस्था भएकाले खनाल परिवारले एउटा सटर मात्र खोलेर समान बिक्री वितरण गर्दै आएको थियो ।
बजारको विचमा आगलागि भएपनि आगलागि नियन्त्रणमा खटिएका प्रहरी र स्थानीय बासिन्दाको अथक प्रयाशले गर्दा आगलागि भएको घरसँगै जोडिएका अन्य घर र पसलमा भने आगलागि हुन सकेन । घरमा विद्युत सर्ट भएर आगलागी भएको हुनसक्ने प्रहरीको अनुमान छ ।
