बुटवल ८ बैशाख
केमिकल एण्ड मेडिकल सप्लायर्स एशोसिएसन अफ नेपाल (केमसन) लुम्बिनी शाखाले कोरोना रोकथाम र नियन्त्रणको लागि पाँच नम्बर प्रदेश सरकारलाई स्वास्थ्य सामाग्री प्रदान गरेको छ ।
केमसनले १ सय सेट पिपिइ, १२ सय थान सर्जिकल माक्स, ५० थान पुनः प्रयोग गर्न सकिने समिरा प्लस, ४४ माक्स गरी ७ लाख ५० हजार रुपैया बराबरको सामाग्री मुख्यमन्त्री शंकर पोखरेललाई हस्तान्तरण गरेको हो ।
विश्वव्यापी रुपमा फैलिएको कोरोना संक्रमणका र यस क्षेत्रको सम्भावित जोमिलाई ध्यान दिँदै कोरोना नियन्त्रणका स्वास्थ्य सामाग्री सहयोग गरेको केमसन लुम्बिनीका अध्यक्ष विष्णु प्रसाद भण्डारीले जानकारी दिनुभयो ।
संकटको बेला एशोसिएसनले सामाजिक दायित्व सम्झेर सहयोग गरेको र यसबाट कोरोना नियन्त्रणमा थोरै भएपनि सहयोग हुने आशा राखेको उहाँले बताउनुभयो । स्वास्थ्य सामाग्री ग्रहण गर्दै मुख्यमन्त्री शंकर पोखरेलले संकटको बेलामा व्यवसायीबाट राम्रो सहयोग मिलेको उल्लेख गर्दै आभार व्यक्त गर्नुभयो । उहाँले आगामी दिनमा पनि यस्तै सहयोगको अपेक्षा राखेको बताउनुभयो ।
सो अवसरमा औषधि व्यवसायी संघका पूर्व केन्द्रीय अध्यक्ष बाबुराम भट्टराई, केमसन लुम्बिनीका निवर्तमान अध्यक्ष विजय खनाल, सचिव दिपक भट्टराई, कोषाध्यक्ष दिपक खनाल, सदस्य सुरज खत्री लगायत व्यवसायीहरुको सहभागीता रहेको थियो ।
