काठमाण्डौ, २ बैशाख । सरकारले मुलुकमा जारी लकडाउनलाई बैशाख १५ गतेसम्म लम्ब्याउने निर्णय गरेको छ । बालुवाटारमा आज (मंगलवार)बसेको मन्त्रिपरिषद् बैठककले गएको चैत ११ देखि जारी लकडाउनलाई १२ दिन थप गरी बैशाख १५ सम्म लम्ब्याउने निर्णय गरेको हो । बैठकले सीमानाका बैशाख १८ गतेसम्मका लागि बन्द राख्ने निर्णय गरेको छ ।
कोरोना सँक्रमण रोकथाम तथा नियन्त्रण उच्चस्तरीय समन्वय समितिले वैशाख १८ गतेसम्म अन्तर्राष्ट्रिय उडान रोक्ने निर्णय यसअघि नै गरिसकेको छ ।
कोरोना सँक्रमण रोकथाम तथा नियन्त्रण उच्चस्तरीय समन्वय समितिले पहिलो पटक गत चैत ११ गते बिहान ६ बजेदेखि एकसाता लकडाउन गर्ने निर्णय गरेको थियो । चैत १० गते बसेको मन्त्रिपरिषद् बैठकले लकडाउनको अवधि दोस्रो पटक आठदिन थपेर चैत २५ गतेसम्म पुर्याएको थियो ।
सुदूरपश्चिम प्रदेशमा एकसाथ तीनजना कारोना भाइरसका सँक्रमित फेला पर्नु र कोरोना नयाँ चरणमा प्रवेश गरेपछि गएको गत चैत २४ गते बसेको मन्त्रिपरिषद् बैठकले तेस्रो पटक थप आठदिन थपेर वैशाख ३ गतेसम्म लकडाउनको अवधि कायम गरेको थियो ।
मंगलबार बसेको मन्त्रिपरिषद् बैठकले चौथो पटक लकडाउनको अवधि १२ दिन थपेर वैशाख १५ गतेसम्म लम्ब्याउने निर्णय गरेको हो । बैठकले लकडाउनलाई अझै कडा बनाउने निर्णय समेत गरेको संस्कृति, पर्यटन तथा नागरिक उड्डयनमन्त्री योगेश भट्टराईले जानकारी गराउनु भयो ।
नेपालमा सोमबारसम्म कोरोना भाइरसबाट संक्रमित हुनेको संख्या १६ पुगेको छ । आइतबार एकैदिन तीनजना र सोमबार दुईजना नयाँ सँक्रमित थपिएका हुन् । यस्तै काठमाडौंको सनसिटी अपार्टमेन्टमा कोरोना आशंका गरिएका तीनजना मध्ये मंगलबार दुईजनामा सँक्रमण पुष्टि भएको छ । उनीहरु एकाघरका सदस्य हुन् । भारतका प्रधानमन्त्री नरेन्द्र मोदीले भारतमा तीव्रगतिमा कोरोना फैलिएपछि बैशाख २१ अर्थात मे ३ तारिखसम्मलाई लकडाउन लम्ब्याउने घोषणा गरिसक्नु भएको छ ।
