रामकुमार श्रेष्ठ
नवलपुर, २६ चैत । पूर्वी नवलपरासीमा अहिलेसम्म कोरोनाबाट संक्रमित भएको आशंकामा २० जनाको स्वाव परीक्षण गरिएकोमा सबैको रिपोर्ट नेगेटिभ आएको छ ।
जिल्ला अस्पताल मध्यविन्दु अस्पतालमा कोरोनाको आशंकामा आईशोलेसनमा रहेका हुप्सेकोटका बाबुछोरा २ जनाको रिपार्ट नेगेटिभ आएसँगै २० जनाकै रिपोर्ट नेगेटिभ आएको हो ।
मंगलवार कोरोना आशंकामा स्वाव परीक्षणका लागि ति दुई जना बाबुछोराको स्वाव चितवनको भरतपुरमा पठाइएको थियो ।
मध्यबिन्दु जिल्ला अस्पतालका कोरोना फोकल पर्सन डा. पुस्कर पौडेलले दुवै जनाको रिपोर्ट नेगेटिभ आएको बताउनुभयो । डा. पौडेलका अनुसार हुप्सेकाट ६ का २० बर्षका किशोर लालसेन ठकुरी चैत ८ गते भारतको उत्तराखण्डबाट नेपाल आएका थिए । ९ गते घर आईपुगेका उनलाई १९ गते ज्वरोसँगै पखाला लागेपछि २३ गते उनका बुवा देबबहादुर सेन ठकुरीले अस्पताल ल्याएका थिए ।
उच्च ज्वरो समेत देखिएको र भारतबाट आएको ट्राभल हिस्ट्री समेत रहेकाले अस्पतालमा ल्याएका ५६ बर्षका बाबुको पनि स्वाव परीक्षणका लागी नमूना लिईएको थियो ।
योसँगै नवलपुरमा कोरोना आशंकामा परीक्षण गरिएका कसैलाई पनि कोभिड १९ संक्रमण नदेखिएको जिल्ला स्वास्थ्य कार्यालय नवलपुरका प्रमुख केशवप्रसाद चापागाईले जानकारी दिनुभयो ।
