बुटवल, २६ चैत । लुम्बिनी प्रादेशिक अस्पताल बुटवलमा कार्यरत ५ जना चिकित्सक कारवाहीमा परेका छन् । कोरोनाको महामारीका बेला विना सूचना अस्पताल नआउने चिकित्सकहरुलाई कारवाही प्रक्रिया शुरु गरिएको प्रदेश ५ को सामाजिक विकास मन्त्रालयले जनाएको छ ।
कारवाही प्रक्रियाको पुष्टि गर्दै लुम्बिनी प्रादेशिक अस्पतालका प्रमुख मेडिकल सुपरिटेण्डेण्ट डा. राजेन्द्रप्रसाद खनालले विना सूचना अस्पतालमा उपस्थित नभएका ५ जना चिकित्सकहरुलाई कारवाही स्वरुप सेवाबाट हटाईएको जानकारी दिनुभयो । मेडिकल सुपरिटेण्डेण्ट डा. खनालका अनुसार अस्पतालमा रेडियोलोजी विभागमा कार्यरत डा. बरदान वली र डा. ताराप्रसाद शर्मा, नाक, कान र घाँटी (इएनटी) विभागका डा. प्रकाश न्यौपाने, युरो सर्जन डा. सुवासचन्द्र चौधरी, आकस्मिक विभागमा कार्यरत डा. प्रकृति कार्कीलाई सेवाबाट हटाईएको हो ।
अस्पतालका अनुसार कारवाहीमा परेका पाँचै जना अस्पताल प्रशासनलाई जानकारी नगराई अस्पतालमा अनुपस्थित रहेका थिए । उनीहरु सबै करारमा नियुक्त चिकित्सकहरु हुन् ।
सामाजिक विकास मन्त्री सुदर्शन बरालले महामारीको वेलामा सेवामा नखटिने जो सुकै चिकित्सकहरुलाई कारवाही गर्न निर्देशन दिएको बताउनुभयो । अस्पताल विकास समितिका अध्यक्ष सूर्य भट्टराईले संकटको बेलामा सेवामा हाजिर नहुने चिकित्सक तथा अन्य स्वास्थ्यकर्मीहरुलाई कारवाही गरिने बताउनु भयो ।
सरकारले पनि विरामी, काजक्रिया र सुत्केरी विदा बाहेकका कुनैपनि विदा स्वीकृत नगर्न र विना जानकारी सेवामा अनुपस्थित हुने चिकित्सक तथा कर्मचारीहरुलाई कारवाही गर्न देशभरीका अस्पताल प्रशासनलाई निर्देशन दिएको छ ।
