बुटवल, २१ चैत । कोरोना भाइरसको त्रास र यसको उच्च जोखिमबाट बच्न सरकारले गरेको लकडाउनका कारण सबै क्षेत्र प्रभावित भएको छ । दिनभरी काम गरेर सांझ विहानको छाक टार्ने मजदुर वर्ग यतिवेला अन्य वर्ग भन्दा सवैभन्दा बढि मारमा परेको छ । लकडाउनका कारण सबैतिर काम बन्द भएपछि कतिपयको घरमा चुल्हो वल्न सकेको छैन । विभिन्न जिल्लाबाट रुपन्देहीमा कामका लागि आएका निर्माण मजदुरहरु पनि यस्तो समस्यामा परेका छन् ।
यसरी समस्यामा परेका निर्माण मजदुरहरुको समस्या समाधानका लागि निर्माण मजदुरहरुको संस्था नेपाल निर्माण तथा सम्बद्ध श्रमिक संघ (काउन) बुटवल नगर समितिले लकडाउनका कारण काम गर्न नपाएका र घर जान नसकेका रुपन्देही जिल्ला बाहिरका निर्माण कर्मीहरुलाई राहत वितरण गरेको छ । काउन बुटवल नगर समितिको आपतकालिन बैठकले सरकारले गरेको लकडाउनका कारण समस्यामा परेका काउनमा आवद्ध कन्ट्याक्ट लिडरहरुको मातहत काम गर्ने जिल्ला बाहिरका निर्माण कर्मी मिस्त्री मजदुरहरुलाई राहत स्वरुप खाद्यान्न वितरण गर्ने निर्णय गरेको हो ।
काउनका राष्ट्रिय अध्यक्ष जे बि गुरुङ्गको आथित्यतामा बसेको आपतकालिन बैठकले समस्यामा परेका निर्माण कर्मीहरुलाई तत्काल राहत वितरण गर्न काउन बुटवल नगर अध्यक्ष सूर्यदेव दासको संयोजकत्वमा तिलबहादुर हिस्की, कृष्णलाल भुसाल, सोम थापा र भिमबहादुर दर्लामी सदस्य रहेको राहत वितरण उपसमिति गठन गरेको थियो ।
उप समितिले यसरी समस्यामा परेका रुपन्देही जिल्ला बाहिरका २७८ जना निर्माण कर्मीहरुलाई ५ किलो चामल तथा एक एक पोका दाल, नुन, स्वयाविन र खाने तेल राहत स्वरुप वितरण गर्ने निर्णय गरेर उनीहरुलाई प्रदान गरिएको संयोजक सुर्यदेब दासले जानकारी दिनुभयो ।
विश्वब्यापी महामारीका रुपमा फैलिएको कोरोना भाइरस(कोभिड–१९)को उच्च जोखिमबाट बच्न सरकारले मुलुकलाई लकडाउन गरेका कारण घर जान र काम गर्ने वातावरण समेत नभएकाले सामाजिक उत्तरदायित्व र मानविय सेवा अन्तर्गत असहज अवस्थामा रहेका निर्माण मजदुरहरुको तत्कालको राहतका लागि काउनले खाद्य सामाग्री वितरण गरेको कोषाध्यक्ष कृष्णलाल भुसालले वताउनु भयो । लकडाउनको अवधि थप भएमा र उनीहरुलाई खानाको समस्या परेमा काउनले तत्काल निर्णय गरी पुन खाद्य सामाग्रीको ब्यवस्थापन गर्ने समेत कोषाध्यक्ष भुसालले जानकारी गराउनु भयो ।
यस्तै लकडाउनकै कारण समस्यामा परेका १७८ जना बर्दिया जिल्लाका निर्माण मजदुरहरुलाई काउन बुटवल नगर समितिका सल्लाहकार सोम थापाको पहलमा बुटवल उपमहानगरपालिका ११ नं. वडा कार्यालयबाट शिफारिस बनाई ४ वटा गाडीको ब्यवस्थापन गरी उनीहरुलाई बर्दिया सम्म छोड्ने ब्यवस्था समेत मिलाईएको नगर अध्यक्ष दासले वताउनु भयो ।
