काठमाडौं, १३ कार्तिक । प्रधानमन्त्री केपी शर्मा ओलीको स्वास्थ्यमा समस्या देखिएको छ । स्वास्थ्यमा समस्या देखिएपछि प्रधानमन्त्री ओलीलाई स्वास्थ्य उपचारका लागि बुधवार धापासी स्थित ग्राण्डी अस्पताल लगिएको छ ।
नेकपा स्रोतका अनुसार मंगलवार तिहारको भाइटीका लगाएको भोलिपल्ट प्रधानमन्त्री ओलीको स्वास्थ्यमा समस्या देखिएको हो । प्रधानमन्त्रीलाई सरकारी निवास बालुवाटारबाट नियमित चेकजाँचका लागि ग्रान्डी अस्पताल लगिएको हो ।
प्रधानमन्त्री केपी शर्मा ओलीको मृर्गाैला प्रत्यारोपण भएका कारण पटक–पटक स्वास्थ्यमा समस्या देखिने गरेको छ ।
स्वास्थ्य उपचारका लागि गत साउन १८ गते सिंगापुर जानुभएका प्रधानमन्त्री ओली साउन २७ गते स्वदेश फर्किनुभएको थियो । त्यसपछि प्रधानमन्त्री ओलीलाई १ हप्तापछि भदौ ५ गते सिंगापुर लगियो । सिंगापुरमा उपचार सकेर उहां २ हप्तापछि भदौ २० गते स्वदेश फर्किनुभएको थियो । उहांको सिंगापुरस्थित नेसनल युनिभर्सिटी अस्पतालमा उपचार भएको थियो ।
सिंगापुरमा उपचार गरेको २ महिना नपुग्दै फेरि बुधवार ओलीको स्वास्थ्यमा समस्या देखिएको हो ।
