बुटवल, १२ असोज । नेपाल मसलन्द तथा शैक्षिक सामाग्री उद्योग संघ ५ नं. प्रदेश समिति तथा बुटवल क्षेत्रिय समितिको आयोजनामा पाल्पाको तिनाउ गाउँपालिका वडा नं. २ बडहरेमा रहेको बालज्योती प्रा. वि. मा अध्ययनरत विद्यार्थीहरुलाई शैक्षिक सामाग्री वितरण गरिएको छ ।
उद्योग संघको पहलमा सो विद्यालयमा अध्ययनरत ५२ गरिव विद्यार्थीहरुलाई झोला, कपी, पेन, पेन्सील तथा अन्य सामाग्री वितरण गरिएको हो । विद्यालय हातामा आयोजित एक कार्यक्रममा गाउँपालिकाका अध्यक्ष ओम बहादुर घर्तीले ती सामाग्री विद्यार्थीहरुलाई वितरण गर्नु भएको थियो ।
त्यस अवसरमा बोल्दै अध्यक्ष घर्तीले ग्रामीण क्षेत्रमा रहेका विद्यालयहरुमा अध्ययन गर्ने वालवालीकाहरु शैक्षिक सामाग्रीहरुको अभावमा शिक्षा आर्जन गर्न विवस भएको अवस्थामा सानो सहयोगको रुपमा प्राप्त सामाग्रीेले ठूलो राहात प्रदान गर्ने विश्वास व्यक्त गर्नु भयो । उहाले गाउँका विद्यालयहरुको स्तरबृद्धिका लागि गाउपालिकाले सक्दो प्रयास गरेको बताउदै त्यसमा संघसंस्थाहरुले हातेमालो गरिदिन आग्रह गर्नु भयो ।
कार्यक्रममा नेपाल मसलन्द तथा शैक्षिक सामाग्री उद्योग संघका केन्द्रीय सदस्य मेघनाथ अधिकारीले व्यवसायीहरु नाफा कमाउनेतर्फ मात्र नलागेर सामाजिक उत्तरदायित्वमा समेत सहभागि हुदै आएको बताउदै स्कूललाई सानो सहयोग दिन पाएकोमा गर्व महसुस भएको धारणा राख्नु भयो ।
नेपाल मसलन्द तथा शैक्षिक सामाग्री उद्योग संघ बुटवलका अध्यक्ष नारायण न्यौपानेको अध्यक्षता संघका प्रदेश सचिव कमल नेपालको संचालन तथा केन्द्रीय सदस्य लक्ष्मण न्यौपानेको स्वागतमा भएको कार्यक्रममा गाउँपालिकाका प्रवक्ता राजेश श्रेष्ठ, विद्यालय व्यवस्थापन समितिका अध्यक्ष बिनोद मल्ली, विद्यालयका प्रधानाध्यापक राजकुमार गाहा लगायत बोल्नु भएको थियो ।
त्यस अवसरमा नेपाल मुद्रण महासंघका केन्द्रीय सदस्य राजु गैरेले विद्यालयलाई खेलकुद सामाग्रीहरु प्रदान गर्नु भएको थियो । संघले करिव १ लाख मुल्य बराबरको शैक्षिक सामाग्री विरतण गरेको जनाएको छ ।
