ट्रक र कार ठक्कर खाँदा पूर्वी नवलपरासीमा पाँच जनाको मृत्यु

नवलपरासी, ७ असोज । पुर्वी नवलपरासीको कावासोतीमा ट्रक र कार एक आपसमा ठक्कर खाँदा कारमा सवार पाँच जनाको ज्यान गएको छ । मृत्यु हुने सबै पुरुष रहेका छन् ।
सोमबारराति १०.१५ बजे कावासोती नगरपालिका– ८ खरकट्टा जंगल स्थित पुर्व—पश्चिम राजमार्गमा पश्चिमबाट पुर्व तर्फ जाँदै गरेको लु १ ख ८५३२ नं.को ट्रक र विपरित दिशाबाट आउदै गरेको बा २१ च ६४०९ नं.को कार एक आपसमा ठक्कर खाँदा कारमा सवार पाँचै जनाको ज्यान गएको प्रहरीले जनाएको छ ।

जिल्ला प्रहरी कार्यालय नवलपरासी पूर्वका अनुसार उनीहरुको उपचारको क्रममा चितवनको भरतपुर सरकारी अस्पतालमा बिहान १.१५ बजे मृत्यु भएको हो ।
प्रहरीका अनुसार नवलपरासीको देवचुली नगरपालिका १ केउरानीका ३५ बर्षीय दिपक भन्ने पूर्णबहादुर विक, देवचुली ५ का दिलबहादुर ढेंगा मगर र कैलाली जिल्लाका सुरज राना मगरको मात्र सनाखत भएको छ । बाँकी २ जनाको सनाखत हुन सकेको छैन । ट्रक र कार प्रहरीको नियन्त्रणमा रहेको छ ।