बुटवलमा बिएएलएलबी कक्षा सञ्चालन

बुटवल, ६ असोज । लुम्बिनी बौद्ध विश्व विद्यालयले यसै शैक्षिक सत्रदेखि बुटवलमा शुरु गरेको बिएएलएलबी कक्षा सञ्चालनमा आएको छ । बिएएलएलबीसंगै विविटिटिएमको नयाँ कक्षा समेत आईतबारबाट शुरु गरिएको छ ।
लुम्बिनी बौद्ध विश्व विद्यालयले पछिल्लो तीन वर्षमा सञ्चालनमा ल्याएका यी महत्वपूर्ण कार्यक्रम हुन । बुटवलस्थित कान्ति माविको भवनमा विश्व विद्यालयका दुई शैक्षिक कार्यक्रम शुरु गरिएको हो । विएएलएलबी सहित विविटिटिएमको कक्षा विश्व विद्यालयका रजिष्टार तिलक आचार्यले उद्घाटन गर्नुभयो ।
सो अवसरमा बोल्दै उहांले लुम्बिनी बौद्ध विश्व विद्यालयका कार्यक्रमहरु विस्तारै बढ्दै जाने बताउनुभयो । विएएलएलबी प्रदेश सरकारको समन्वयमा शुरु गरिएको भन्दै यसलाई अझै विस्तार गरिने उहांले बताउनु भयो । लुम्बिनी र बुटवलमा सञ्चालनमा भएका कार्यक्रमले नयाँ प्रकृतिका जनशक्ति उत्पादन गर्ने उहांले बताउनु भयो ।
सो अवसरमा बोल्दै विश्व विद्यालयका मानविकी तथा समाजिक विज्ञान अध्ययन संकायनका डीन प्रा.डा.वेद गिरीले विएएलएलबी कक्षा बुटवलमै सञ्चालनमा आउनुले विद्यार्थीहरुलाई सहज भएको बताउनुभयो । कानुन विषयलाई बौद्ध दर्शनसंग जोड्नु अझै महत्वपूर्ण रहेको उहांले बताउनु भयो ।
बौद्ध अध्ययन संकायका डीन डा. माणिकरत्न शाक्यले बौद्ध विश्वविद्यालयले सञ्चालन गरेका शैक्षिक कार्यक्रमको विषयमा जानकारी गराउनु भयो ।
सो अवसरमा दुबै कार्यक्रमतर्फका विद्यार्थीलाई स्वागत गरिएको विविटिटिएम कार्यक्रमका संयोजक वलवहादुर पाण्डेले जानकारी दिनुभयो । यी दुबै कक्षा विहानीसत्रमा सञ्चालन हुने उहांले बताउनु भयो । यसअघि जानकीनगरमा सञ्चालन भएको बिबिटिटिएम कार्यक्रम समेत यो सत्रसंगै कान्ति स्कूल परिसरमा सरेको हो । विएएलएलबीमा ८० जना र विविटिटिएममा ३० जना विद्यार्थी भर्ना भइसकेको विश्व विद्यालयले जनाएको छ ।
यसैबिच लुम्बिनी बौद्ध विश्व विद्यालयमा मानविकी तथा समाजिक विज्ञान अध्ययन संकायतर्फको डीनमा प्रा. डा. बेद गिरी नियुक्त हुनुभएको छ । अमेरिकाको भर्जिनिया युनिभर्सिटीबाट विद्यावारिधी गरेका गिरीले अमेरिकामै १८ वर्ष प्राध्यापन गर्नुभएको हो । विश्व विद्यालयले पहिलो पटक यो संकायमा डीन नियुक्त गरेको हो ।