बुटवल, २४ भदौ । प्रदेश पाँचको अस्थायी मुकाम बुटवलमा संचालित लुम्बिनी प्रादेशिक अस्पतालमा कालाजारबाट एक जनाको मृत्यु भएको छ ।
मृत्यु हुनेमा पाल्पाको रैनादेवी छहरा गाउँपालिका बल्ढेङगढीकी जीवन राना रहेको अस्पतालका मेडिकल सुपरिटेन्डेन्ट डा. कृष्ण खनालले जानकारी दिनुभयो ।
भैरहवास्थित मेडिकल कलेजमा उपचारको क्रममा कालाजार भएको पत्ता लागेपछि भैरहवा बाट रिफर गरी रानालाई थप उपचारको लागि प्रादेशिक अस्पताल बुटवलमा उपचारार्थ भर्ना गरिएको थियो । चिकित्सकका अनुसार भुसुनाको टोकाइबाट यो रोग लाग्ने गर्दछ ।
यो रोग लागेमा सामान्यतया लगातार ज्वरो आउने गर्छ भने फियो र कलेजोमा संक्रमण बढ्न गइ पेट फुल्लिने, कमजोरी महसुस हुने लगायतका लक्षण देखिने डा. खनालले बताउनु भयो ।
चिकित्सकका अनुसार यो रोग लागेमा रक्तअल्पत्ता हुने, मानिस दुब्लाउँदै जाने, फियो धेरै बढ्ने तथा केही समयपछि कलेजो समेत बढ्ने समस्या उत्पन्न हुने गर्दछ ।
कालाजार ‘ले समानिया डोनोभानी’ नामक प्यारासाइट प्रोटोजोवाका कारण हुने रोग हो र यो एक प्रकारको सेन्टलाई नामक भुसुनाको टोकाइबाट सर्ने गर्दछ ।
