काठमाडौं, २३ भदौ । आज नेपाल र चीनबीच दुईपक्षीय परराष्ट्रमन्त्रीस्तरीय वार्ता हुंदै छ । नेपाली प्रतिनिधि मण्डल र चिनियाँ प्रतिनिधि मण्डलबीच होटल याक एण्ड यतीमा वार्ता हुनेछ । परराष्ट्रमन्त्रालयका अनुसार दुईपक्षीय वार्ता पछि दुई पक्षीय प्रतिनिधि मण्डल बीचमा दुई सम्झौतामा हस्ताक्षर हुने छ ।
वार्ताका लागि उत्तरी छिमेकी मुलुक चीनका विदेशमन्त्री वाङ यी हिजो आईतबार साँझ काठमाडौं आइपुग्नु भएको छ ।
नेपालको तीनदिने औपचारिक भ्रमणका लागि विदेशमन्त्री वाङ यी काठमाडौं आउनुभएको हो । विदेशमन्त्री वाङ यीलाई नेपालको परराष्ट्र मन्त्रालयका सचिव शंकरदास वैरागीसहितको उच्चस्तरीय टोलीले त्रिभुवन अन्तर्राष्ट्रिय विमानस्थलमा स्वागत गरेको थियो । परराष्ट्रमन्त्री प्रदीपकुमार ज्ञवालीको निमन्त्रणामा चीनका विदेशमन्त्री वाङ यी नेपाल आउनुभएको हो ।
नेपालमा नेकपाको दुई तिहाइको सरकार बनेपछि चीनको तर्फबाट भएको यो उच्च स्तरीय औपचारिक राजनीतिक भ्रमण हो ।
विदेशमन्त्री वाङ यीले नेपाल भ्रमणका क्रममा राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग शिष्टाचार भेटघाट गर्ने कार्यक्रम रहेको छ । त्यसैगरी, विदेशमन्त्री वाङ यीले पूर्वप्रधानमन्त्री तथा नेकपाका अध्यक्ष पुष्पकमल दाहाल प्रचण्ड, प्रमुख प्रतिपक्षी दलका नेता, पूर्वप्रधानमन्त्री तथा कांग्रेसका सभापति शेरबहादुर देउवासँग पनि भेटघाट गर्ने कार्यक्रम रहेको काठमाडौंस्थित चिनियाँ दूतावासले जानकारी दिएको छ ।
