बुटवल । सरकारी छापको दुरुपयोग गरेको आरोपमा मालपोत कार्यालय बुटवलका अधिकृत घनश्याम अर्यालसहित दुई जना पक्राउ परेका छन् ।
सरकारी छापको दुरुपयोग गर्दै अर्कै व्यक्तिको नाममा रहेको जग्गाको नक्कली लालपुर्जा निकालेको आरोपमा बुटवल मालपोत कार्यालयका अधिकृत घनश्याम अर्याल सहित अन्य २ जनालाई पक्राउ गरिएको जिल्ला प्रहरी कार्यालय रुपन्देहीले जनाएको छ ।
जिल्ला प्रहरी प्रमुख प्रहरी उपरीक्षक प्रदिप क्षेत्रीका अनुसार नक्कली लालपुर्जा प्रकरणमा अर्यालसँगै भैरहवा मालपोत कार्यालयका कार्यालय सहयोगी सञ्जय कुमार केवट र तिलोत्तमा नगरपालिकाकी रञ्जना थापा पनि पक्राउ परेकी छन् ।
उनीहरूलाई सरकारी छापको दुरुपयोग र नक्कली लालपुर्जा बनाइदिएको अभियोगमा जिल्ला अदालतको पक्राउ पुर्जीका आधारमा पक्राउ गरिएको प्रहरी उपरीक्षक क्षेत्रीले बताउनुभयो । प्रहरी प्रमुख क्षेत्रीका अनुसार उक्त प्रकरणमा संलग्न अन्य मालपोत कर्मचारी विरुद्ध पनि पक्राउ पुर्जी जारी भएको छ । उनीहरूलाई शुक्रबार दिउँसो पक्राउ गरिएको प्रहरीले जनाएको छ ।
जिल्ला प्रहरी कार्यालय रूपन्देहीका सूचना अधिकारी प्रहरी नायब उपरीक्षक (डीएसपी) गणेश सापकोटाका अनुसार उनीहरू पुरानो कित्ता (जग्गा) प्रकरणसँग सम्बन्धित मुद्दामा पक्राउ परेका हुन् । घटनामा संलग्न केही अन्य मालपोत कर्मचारी फरार रहेको उहांले बताउनुभयो ।
स्रोतका अनुसार पक्राउ परेका र पक्राउ पुर्जी जारी भएकाहरूले घुस रकम लिएर सरकारी र कतिपय अन्य व्यक्तिको जग्गाको समेत नक्कली लालपुर्जा बनाइ बिक्री वितरण गर्ने र सोही लालपुर्जा धितो राखेर सहकारी संस्थाबाट ऋण समेत निकालेका छन् ।
मालपोत अधिकृत अर्यालले तिलोत्तमाको मणिग्राम चोकदेखि पश्चिम हरपुरमा रहेको कित्ता नं. १५७ को नक्कली लालपुर्जा निकालेको प्रहरीको भनाइ छ । १५७ नम्बरको उक्त कित्तालाई २०७१ सालमा फोडेर जग्गाको जोत भोग गर्दै आएका परिवारका नाममा कायम गरी १, २, ३, ४ गर्दै क्रमशः १५ सम्म कित्ता कायम गरिएको थियो । घटनाको बिषयमा थप अनुसन्धान भइरहेको प्रहरीले जनाएको छ ।
