बुटवल । राजस्व अनुसन्धान विभागले बुटवलका दुई व्यापारी विरुद्ध कर छलीको आरोपमा अदालतमा मुद्दा दायर गरेको छ ।
विभागले ब्यापारीहरु अजय अग्रहरी र पशुपति अग्रहरी बिरूद्व ४ करोड ८३ लाख २५ हजार ८८६ रुपैयाँ बिगो मागदाबी गरी उच्च अदालत तुलसीपुर बुटवल इजलासमा अभियोग पत्र दर्ता गरेको हो ।
रुपन्देहीको बुटवल उपमहानगरपालिका–५, न्यूरोडमा रहेको अजय वेङ्गल स्टोर्सका प्रोप्राइटर अजय अग्रहरी र कारोबारी पशुपति अग्रहरीले वास्तविक कारोबारको बिल जारी नगरी माल वस्तु बिक्री गर्नुका साथै भन्सार चोरी पैठारी गरेका माल वस्तुको कारोबार गरी मूल्य अभिवृद्धि कर, भन्सार महसुल र आयकर छली गरेको अभियोग पत्रमा उल्लेख छ ।
विभागका अनुसार उनीहरूले भन्सार चोरी पैठारीबाट रु. ९५ लाख ८३ हजार ७५५, मूल्य अभिवृद्धि कर तर्फ रु. ९९ लाख ८९ हजार ९८४ र आयकर तर्फ रु. २ करोड ८७ लाख ५२ हजार १४७ गरी जम्मा रु. ४ करोड ८३ लाख २५ हजार ८८६ बराबरको राजस्व छली गरेको पाइएको छ ।
राजस्व चुहावट (अनुसन्धान तथा नियन्त्रण) ऐन, २०५२ बमोजिम उनीहरूमाथि छली गरिएको रकम बराबर जरिवाना र हदैसम्मको कैद सजाय माग दाबी गर्दै अभियोग पत्र दर्ता गरिएको राजस्व अनुसन्धान कार्यालय बुटवलका प्रमुख अनुसन्धान अधिकृत विवेक घिमिरेले जानकारी दिनुभयो ।
