परासी । वर्षाका कारण दाउन्नेमा सडक चिप्लो भएपछि पूर्व–पश्चिम राजमार्गमा सवारी आवागमन अबरुद्ध भएको छ ।
पूर्व–पश्चिम राजमार्ग अन्तर्गत पूर्वी र पश्चिम नवलपरासीको दाउन्ने खण्डमा यातायात सञ्चालन अवरुद्ध भएको प्रहरीले जनाएको छ । सडक हिलो हुँदा सवारी साधन सडकमा चिप्लिएपछि दुवैतर्फ यातायात अवरुद्ध भएको हो ।
चिप्लोमा सवारी उकालो चढ्न नसकेपछि अहिले सो सडक भएर चल्ने सवारी साधनहरु पूर्वतर्फ दुम्कीबास र पश्चिमतर्फ बर्दघाटमा रोकिएका जिल्ला प्रहरी कार्यालय पूर्वी नवलपरासीका डीएसपी मधु नेपालले जानकारी दिनुभयो । सडक विस्तारको काम भइरहेको यस खण्डमा चिप्लो सडकमा गिट्टीसमेत नहाल्दा सवारीसाधन सञ्चालनमा असहज हुँदै आएको छ । जसका कारण सयौं यात्रु अलपत्र परेका छन् । प्रशासनले भने दाउन्ने खण्डको यात्रा गर्नुपर्ने यात्रुलाई वैकल्पिक मार्गको प्रयोग गर्न आग्रह गर्दै आएको छ ।
यो सडक खण्डमा सामान्य वर्षामा पनि सडक हिलो भएर घण्टौं यातायात अवरुद्ध हुने गरेको छ । अहिले पनि पानी परिरहेकाले पानी पर्न रोकिएपछि मात्र यातायात सञ्चालनमा आउने प्रहरीले जनाएको छ ।
