बुटवल । शुक्रबार आएको हावाहुरीले ढालेको रुखले च्यापिएर नवलपरासीमा २ जानाको ज्यान गएको छ । पश्चिम नवलपरासीको सुनवल नगरपालिका वडा नम्बर ७ चारपालामा शुक्रबार साँझ आएको हावाहुरीले रुख ढाल्दा ३० वर्षीया मिरा बयम्बु र सोही वडाका ४० वर्षीय दुर्गाबहादुर पुनको मृत्यु भएको जिल्ला प्रहरी कार्यालय नवलपरासीका सूचना अधिकारी विरदत्त पन्तले जानकारी दिनुभयो ।
हावाहुरीसहित आएको पानीबाट जोगिन सडक किनारमा रहेको प्रतीक्षालयमा ओत लागेको बेला रुख ढलेर प्रतीक्षालयमाथी बज्रिँदा प्रतीक्षालय भत्किन गइ च्यापिएर उनीहरूको मृत्यु भएको हो । उक्त घटनामा परी अन्य तीन जना घाइते भएका छन् ।
घाइतेहरूमा सुनवल न.पा.–७ चारपालाकी नरमति परीयार, सुनवल न.पा.–७ चारपालाकै दुर्गेश्वरा खाम्चा मगर र सुनवल न.पा.–७ चारपालाकै अनिल थापा रहेका छन् । घाइतेको अवस्था गम्भीर रहेको प्रहरीले जनाएको छ । घटना थाहा पाए लगत्तै जिल्ला प्रहरी कार्यालय नवलपरासीका कार्यालय प्रमुख प्रहरी उपरीक्षक अनुपम श्रेष्ठ समेतको कमाण्डमा टोली उद्धारका लागि घटना स्थल पुगेको थियो ।
यसैगरी कपिलवस्तुको कपिलवस्तु नगरपालिका ९८ मैनिहवाकी १४ बर्षिया सुखना केवटको पनि रूखले च्यापेर मृत्यु भएको छ । तौलिहवा–लुम्बिनी सडक खण्डअन्तर्गत मैनिहवामा पर्ने बगैँचामा आँप टिप्न गएका बेला चोट लागेर घाइते भएकी केवटलाई तौलिहवास्थित जिल्ला अस्पताल लगिएकामा चिकित्सकले मृत घोषणा गरेका थिए । तीव्र गतिमा चलेको हावाले आँपको रूखको हाँगा भाँच्चिएर खस्दा लागेपछि उनको मृत्यु भएको जिल्ला प्रहरी कार्यालयका सूचना अधिकारी तथा डिएसपी मोहनमणि अधिकारीले बताउनुभयो ।
यस्तै रुपन्देहीका विभिन्न ठाउँमा पनि हावाहुरीले क्षति पु¥याएको छ । बुटवल, देवदह, भैरहवा, मर्चवार लगाएत क्षेत्रका केही घरमा हावाहुरीले क्षति पु¥याएको हो भने केही ठाउँमा रुखहरू ढलाएको छ । हावाहुरीका कारण रुपन्देहीमा मानवीय क्षति भने नभएको प्रहरीले जनाएको छ ।
हावाहुरीका कारण नवलपरासी, रूपन्देही, कपिलवस्तु, कैलाली, बारा, कञ्चनपुर, सर्लाही, चितवन, कास्की, उदयपुर, सिराहा लगायतका जिल्लामा क्षति पुगेको बताइएको छ ।
