सडक भासिएपछि अवरुद्ध दाउन्नेको सडक एकतर्फी सुचारु

परासी । पूर्वपश्चिम राजमार्ग अन्तर्गत दाउन्नेको सडक एकतर्फी सुचारु भएको छ । पश्चिम नवलपरासी बर्दघाट नगरपालिका–४ दाउन्ने जंगल खुर्सानीखोलामा अबिरल बर्षाको कारण सडक भासिनुका साथै हाईटेन्सन लाईनको पोल सडकतर्फ ढलेका कारण सोमबार अपान्हदेखि अवरुद्ध सडक एकतर्फी सुचारु भएको जिल्ला प्रहरी कार्यालय नवलपरासी पश्चिमले जनाएको छ ।
नवलपरासी बर्दघाट वडा न. ४ को दाउन्ने जंगलमा रहेको खुर्सानीखोलामा सडक सोमबार दिउँसो १५ः४० बजेदेखि सडक अवरुद्ध थियो ।
गएराती देखि नै मर्मत थालिएको र मंगलबार बिहानदेखि एकतर्फी यातायात सुचारु गरिएको प्रहरीले जानकारी दिएको छ । प्रहरीले शुरुमा यात्रुबाहक सवारी साधनलाई मात्र जान दिएको र सडकको मर्मत पूर्ण रुपमा सम्पन्न भएपछि मात्र मालबाहक सवारी साधन जान दिने बताएको छ । प्रहरीका अनुसार सडक दुईतर्फि संचालनको प्रयास जारी रहेको छ ।