बुटवल । जनता समाजवादी पार्टी (जसपा) बाट प्रतिनिधि सभा सदस्य रहेकी मञ्जु शर्मा अन्सारीको निधन भएको छ । उहांको काठमाडौंको नयाँ बानेश्वरस्थित सिभिल अस्पतालमा उपचारका क्रममा आज बिहान ७ ः ५५ बजे निधन भएको जसपा संसदीय दलका उपनेता नवलकिशोर साह सुडीले जानकारी दिनुभयो ।
जसपाबाट समानुपातिक निर्वाचन प्रणालीबाट प्रतिनिधिसभा सदस्य रहनुभएकी शहनाज रहमानको २०७९ फागुन १३ गते निधन भएपछि रिक्त रहेको स्थानमा अन्सारीलाई २०७९ चैत १९ गते समानुपातिकतर्फबाट प्रतिनिधि सभा सदस्य बनाइएको थियो ।
यसैबीच सभामुख देवराज घिमिरेले आइतबार सिभिल अस्पतालमा पुगेर परिवारजनमा शोक व्यक्त गर्नुभएको छ । २०४६ सालको आन्दोलनदेखि राजनीतिक यात्रा सुरूवात गर्नुभएकी अन्सारी सद्भावना पार्टीमा आबद्ध भई २०४६ सालदेखि २०५६ सम्म उपत्यका महिला इन्चार्ज रहनुभएको थियो । उहां जसपाको पोलिटब्यूरो सदस्य समेत हुनुहुन्थ्यो ।
