तिलोत्तमा । रुपन्देहीको तिलोत्तमा नगरपालिकामा निर्माण गरिएको एक्स्ट्राटेक ओभल क्रिकेट मैदानको उद्घाटन गरिएको छ । क्रिकेट मैदानको लुम्बिनी प्रदेश प्रमुख अमिक शेरचनले सोमबार उद्घाटन गर्नुभएको हो । प्रदेश प्रमुख शेरचनले मैदानमा ब्याटले बल प्रहार गरी मैदानको उद्घाटन गर्नुभएको हो ।
अस्ट्रेलियामा व्यवसाय गर्दै आएका विनोद कुवँरले आफ्नो निजी लगानीमा मैदान निर्माण गर्नुभएको हो । तिलोत्तमा नगरपालिका–१७ स्थित पूर्व दरखसवामा गत जेठ २९ गते शिलान्यास भएको रंगशालाको पहिलो चरणको कामअन्तर्गत खेल मैदान ९ महिनामै तयार भएको हो ।
क्रिकेट मैदानको पहिलो चरणको निर्माण कार्य सकिएसँगै सोमबार ‘लिजेन्ट्स कप’ आयोजना गरिएको छ । मैदान उद्घाटनका अवसरमा लिजेन्ट्स कप टी १० क्रिकेट प्रतियोगिता समेत आयोजना गरिएको छ । जसमा नेपालको पहिलो अन्तर्राष्ट्रिय खेल खेलेको सन् १९९६ को टोली, सन् २०१४ को टी–२० विश्वकप खेलेको टोली, रूपन्देही लेजेन्ड्स र रेस्ट अफ नेपाल गरी ४ टोलीले सहभागिता जनाएका छन् ।
नेपाल क्रिकेट संघ (क्यान) का सचिव पारस खड्काले सन् २०१४ टिमको, एलबी क्षेत्रीले सन् १९९६ टिमको, कलाम अलीले रेस्ट अफ नेपालको र हरिबहादुर थापाले रुपन्देही लेजेन्ड्स टिमको कप्तानी गरेर खेलेका छन् ।
